اسلام آباد(روشن پاکستان نیوز) صدر مملکت آصف علی زرداری نے کہا ہے کہ چین کی ترقی سے خوف زدہ نہیں ہونا چاہیے۔
صدر مملکت آصف علی زرداری نے غیر ملکی نشریاتی ادارے کو دیئے گئے انٹرویو میں کہا کہ پاک چین دوستی صرف اچھے وقتوں کی نہیں بلکہ سدا بہار دوستی ہے۔ پاکستان اور چین قریبی ہمسائے ہیں اور تمام حالات میں دوست رہیں گے۔
انہوں نے کہا کہ پاکستان چین کی ترقی اور اپنے جغرافیہ سے مکمل طور پر مستفید ہونے کا خواہاں ہے۔ ہم چینی عوام سے محبت رکھتے ہیں اور چین کے ساتھ کھڑے رہیں گے۔ چینی صدر مضبوط اور مستقل مزاج ہیں۔ اور وہ عالمی حالات کا ادراک رکھتے ہیں۔
آصف علی زرداری نے کہا کہ پاک چین تعلقات تاریخی ہیں۔ جو نسلوں پر محیط ہیں اور چینی صدر شی جن پنگ کے سیاسی فلسفے اور طرز حکمرانی کا معترف ہوں۔ چین نے صدر شی جن پنگ کی قیادت میں ترقی کی کئی منازل طے کی ہیں۔
انہوں نے کہا کہ چین کی ترقی دنیا کے لیے خوش آئند ہے۔ اور چین نے تاریخ میں کبھی بھی قابض ملک کا کردار ادا نہیں کیا۔ چین دوسرے ملکوں میں مداخلت نہیں کرتا اور چین کی ترقی سے خوف زدہ نہیں ہونا چاہیے۔ چین کے ساتھ لازوال دوستی پر یقین رکھتے ہیں۔
صدر مملکت نے کہا کہ چین کے ساتھ روابط، سڑکیں اور مواصلات مزید بہتر اور پائیدار بنانے کی ضرورت ہے۔ جبکہ چین زرعی شعبے میں پاکستان کی مدد کرسکتا ہے۔ پاکستان کے زرعی شعبے کی فی ایکڑ پیداواری صلاحیت چین کے مقابلے میں کم ہے۔
مزید پڑھیں: حکومت سندھ کا فزیکل ان فٹ گاڑیوں کے خلاف کریک ڈاؤن کا فیصلہ
انہوں نے کہا کہ پاکستان میں چین کے لیے خصوصی انڈسٹریل پارکس پر كام کر رہے ہیں۔ ماحولیات، آبپاشی سمیت مختلف شعبوں میں ملکی ترقی کے لیے چین کی ٹیکنالوجی سے مستفید ہونے کے خواہاں ہیں۔
آصف علی زرداری نے کہا کہ چین کی ترقی خطے کے مفاد میں ہے۔ اور چین کی خلائی شعبے میں ترقی نئی نہیں۔ پاکستان چین کے ساتھ خلائی شعبے میں اپنی استعداد کار بڑھا رہا ہے۔
انہوں نے کہا کہ شنگھائی تعاون تنظیم خطے کی ترقی میں کردار کرے گی اور ہماری توجہ پاکستان کے استحکام پر مرکوز ہے۔ چین کے ساتھ تعلقات پاکستان کی اولین ترجیح ہیں
