رانی پور (روشن پاکستان نیوز) سندھ کے علاقے رانی پور میں زائرین کی بس خوفناک حادثے کا شکار ہوگئی ، حادثے میں 11 افراد جاں بحق اور 36 زخمی ہوئے۔
تفصیلات کے مطابق حضرت لال قلندر شہباز کے عرس پر پنجاب سے سیہون شریف جانے والے زائرین کی بس رانی پور کے قریب گڈیجی کے مقام پر ڈرائیور کے قابو سے باہر ہوکر الٹ گئی۔
افسوسناک واقعے میں 11 زائرین جاں بحق ہو گئے جبکہ 36 سے زائد خواتین، مرد اور بچے زخمی ہوگئے ہیں۔
حادثے کی اطلاع پر پولیس، رینجرز اور ریسکیو کے ادارے وقوعہ پر پہنچ گئے ، جنہوں نے لاشوں اور زخمیوں کو اسپتال منتقل کیا۔
حادثے کی اطلاع پر کمشنر سکھر کے احکامات پر ضلع بھر کی اسپتالوں میں ایمرجنسی نافذ کردی گئی، تمام زخمی، گمس اور سول اسپتال خیرپور میں زیر علاج ہیں تاہم زخمیوں میں کچھ کی حالت تشویشناک ہے۔
حادثے کی ابتدائی اطلاع رینجرز کانوائے کمانڈر نے ریسکیو اور پولیس کو دی، حادثے کے وقت رینجرز کانوائے جائے حادثہ سے گزر رہا تھا ، رینجرز کی بھاری نفری نے ریسکیو عمل میں حصہ لیا۔
ڈپٹی کمشنر خیرپور سید فواد احمد کا کہنا تھا کہ سیہون جانے والی زائرین کی بس کو حادثہ تیز رفتاری کے باعث پیش آیا۔
