کراچی (میاں خرم شہزاد) کراچی میں مختلف ٹرانسپورٹر ایسوسی ایشنز کے وفد نے سینئر وزیر شرجیل انعام میمن کی قیادت میں وزیر داخلہ ضیا الحسن لنجار اور وزیر ایکسائز مکیش کمار چاولہ سے ملاقات کی۔ ملاقات میں کراچی کے ٹرانسپورٹ شعبے کو درپیش مسائل اور ان کے حل کے بارے میں تفصیل سے بات چیت کی گئی۔ اس موقع پر سیکرٹری ایکسائز محمد سلیم راجپوت، سیکرٹری ٹرانسپورٹ اسد زمین، کمشنر کراچی حسن نقوی، سی سی پی او کراچی جاوید عالم اڈھو اور ڈی آئی جی ٹریفک احمد نواز چیمہ سمیت اہم حکام بھی موجود تھے۔
ملاقات میں کراچی گڈز کیریئرز ایسوسی ایشن، ڈمپر ایسوسی ایشن، سندھ گڈز ٹرک ٹریلر اونرز ایسوسی ایشن اور واٹر ٹینکرز ایسوسی ایشن کے رہنماؤں نے بھی شرکت کی اور شہر میں داخلے کی مخصوص اوقات پر عائد پابندیوں کے حوالے سے اپنی پریشانیوں کا اظہار کیا۔
سینئر وزیر شرجیل انعام میمن نے کہا کہ حکومت نے ٹرانسپورٹرز کے مسائل کو مدنظر رکھتے ہوئے ایک گھنٹہ اضافی وقت دینے کا فیصلہ کیا ہے۔ اب بڑی گاڑیاں رات 10 بجے سے صبح 6 بجے تک شہر میں داخل ہو سکیں گی، جس سے ٹرانسپورٹرز کی آپریشنل مشکلات میں کمی آئے گی۔ انہوں نے کہا کہ سندھ حکومت ٹرانسپورٹرز کے چیلنجز کو سمجھتی ہے اور ان کے ساتھ مل کر ان مسائل کے حل کے لیے پُرعزم ہے۔
وزیر داخلہ ضیا الحسن لنجار نے اس موقع پر ٹرانسپورٹرز سے اپیل کی کہ وہ ٹریفک میں خلل ڈالنے والے اقدامات سے گریز کریں اور عوامی زندگی کو متاثر کرنے والے کسی بھی اقدام کو سختی سے نمٹنے کا اعلان کیا۔ انہوں نے کہا کہ ہمیں کراچی کی بہتری کے لیے مل کر کام کرنا ہوگا اور ٹریفک کے روکے جانے جیسے مسائل کو برداشت نہیں کیا جائے گا۔
مزید پڑھیں: صحافیوں کے پلاٹس پر 80 فیصد سندھ حکومت کی ادائیگی اور ترقیاتی کاموں کے لئے تمام اقدامات مکمل
ٹرانسپورٹرز کے رہنماؤں نے حکومت کی جانب سے ان کے مسائل کے حل کے لیے کی جانے والی کوششوں کی تعریف کی اور کہا کہ داخلے کے اوقات میں اضافے سے ان کے لاجسٹک چیلنجز میں کمی آئے گی۔ انہوں نے اس بات پر بھی اتفاق کیا کہ گاڑیوں کی رجسٹریشن اور فٹنس سرٹیفکیٹ حاصل کرنا ضروری ہے اور وہ حکومت کے ساتھ مل کر ان مسائل کے حل کے لیے کام کریں گے۔
یہ ملاقات شہر میں ٹرانسپورٹ کے نظام کی بہتری کے لیے ایک اہم قدم ثابت ہو سکتی ہے اور حکومت کی جانب سے ٹرانسپورٹرز کے ساتھ تعاون کے عزم کو ظاہر کرتی ہے۔
