اسلام آباد(روشن پاکستان نیوز) پاکستان نے امریکی صدر ڈونلڈ ٹرمپ کے غزہ سے متعلق بیان کو ناانصافی پر مبنی قرار دیتے ہوئے فلسطینی عوام کے حق میں اپنا دوٹوک مؤقف دہرایا ہے۔ دفتر خارجہ کے ترجمان شفقت علی خان نے ہفتہ وار بریفنگ میں کہا کہ پاکستان کا مسئلہ فلسطین پر مؤقف 1947 سے واضح ہے اور اس میں کوئی تبدیلی نہیں آئی۔
ترجمان دفتر خارجہ نے کہا کہ فلسطینیوں کو ان کی زمین سے ہٹانے کا بیان غیر منصفانہ ہے، پاکستان فلسطینی عوام کے ساتھ کھڑا ہے اور غزہ میں جنگ بندی معاہدے کی اسرائیلی خلاف ورزیوں کی مذمت کرتا ہے۔ انہوں نے عالمی برادری سے مطالبہ کیا کہ وہ ان خلاف ورزیوں کو بند کرانے کے لیے مؤثر اقدامات کرے۔
بلاول بھٹو کے امریکی دورے کے شیڈول پر لاعلمی
ترجمان دفتر خارجہ نے سابق وزیر خارجہ بلاول بھٹو زرداری کے دورۂ امریکہ کے شیڈول کے بارے میں لاعلمی کا اظہار کیا اور کہا کہ امریکی صدر سے ان کی ملاقات کے حوالے سے دفتر خارجہ کے پاس کوئی شیڈول موجود نہیں، اس بارے میں پاکستان پیپلز پارٹی ہی وضاحت دے سکتی ہے۔
افغان پناہ گزینوں کی واپسی اور سیکیورٹی امور
ترجمان نے غیر قانونی طور پر مقیم افغان شہریوں کی واپسی کو قانونی عمل قرار دیتے ہوئے کہا کہ پاکستان اس حوالے سے تمام متعلقہ ممالک کے ساتھ رابطے میں ہے۔ انہوں نے مزید کہا کہ سگار رپورٹ نے ہمارے اس مؤقف کی توثیق کی ہے کہ افغان حکومت کو اپنی سرزمین پر دہشت گرد گروہوں کے خلاف کارروائی کرنی چاہیے۔
گوانتاناموبے کے دوبارہ کھلنے سے متعلق سوال پر ترجمان نے کہا کہ یہ معاملہ امریکہ کے ساتھ پاکستان کی بات چیت کا حصہ نہیں ہے، جبکہ جرمنی میں پاکستانی سفارت خانے پر حملے کے حوالے سے پاکستانی حکومت جرمن حکام سے مسلسل رابطے میں ہے۔
ترکیہ کے صدر کے دورۂ پاکستان کی تیاریاں مکمل ہونے کے قریب
ترجمان دفتر خارجہ نے بتایا کہ ترکیہ کے صدر رجب طیب اردوان کے دورۂ پاکستان کے حوالے سے معاملات ایڈوانس مرحلے میں ہیں اور جلد تفصیلات جاری کی جائیں گی۔
کشمیر اور ڈاکٹر عافیہ صدیقی کے معاملے پر مؤقف
کشمیر کے حوالے سے ترجمان دفتر خارجہ نے کہا کہ پاکستان کا مؤقف کشمیری عوام کی امنگوں کے مطابق ہے اور ”کشمیر بنے گا پاکستان“ کے عزم پر کوئی سمجھوتہ نہیں ہوگا۔
ڈاکٹر عافیہ صدیقی کے معاملے پر شفقت علی خان نے کہا کہ ان کی سابق امریکی صدر بائیڈن کو دی گئی رحم کی اپیل مسترد ہو گئی ہے اور امریکی محکمہ انصاف نے کیس کو بند کر دیا ہے۔ تاہم، عافیہ صدیقی مستقبل میں اپنے وکلاء کے ذریعے دوبارہ رحم کی اپیل دائر کر سکتی ہیں۔
کشن گنگا ڈیم کا معاملہ اگست 2025 میں آگے بڑھے گا
ترجمان نے کہا کہ کشن گنگا اور ریتلے منصوبوں پر غیر جانبدار ماہرین کا معاملہ اگست 2025 میں دوبارہ زیر غور آئے گا۔ پاکستان اپنے آبی حقوق کے تحفظ کے لیے ہر ممکن اقدامات اٹھا رہا ہے۔
مزید پڑھیں: امریکی صدر نے غزہ پر قبضے کا اعلان کردیا
