لاہور(روشن پاکستان نیوز) پنجاب یونیورسٹی میں آج پنجاب گورنمنٹ کے تعاون سے ایک شاندار انعامات کی تقسیم کی تقریب منعقد ہوئی، جس میں اہم تعلیمی شخصیات، طلبہ اور معزز مہمانوں نے شرکت کی۔ اس تقریب کے مہمان خصوصی راجہ ضمیر الدین احمد، اسسٹنٹ اٹارنی جنرل پاکستان تھے، جنہوں نے تقریب میں شرکت کر کے اپنی موجودگی کو باعث فخر بنایا۔ انہوں نے تعلیمی شعبے میں نمایاں کارکردگی کا مظاہرہ کرنے والے طلبہ میں انعامات تقسیم کیے اور ان کی حوصلہ افزائی کی۔
تقریب کے دوران، راجہ ضمیر الدین احمد نے اپنے خطاب میں کہا کہ یہ تمام کامیابیاں حکومتِ پنجاب کی بہترین پالیسیوں اور اصلاحات کا نتیجہ ہیں۔ انہوں نے خاص طور پر محترمہ مریم نواز شریف کا ذکر کرتے ہوئے کہا کہ ان کی قیادت میں ہونے والی دن رات محنت نے تعلیمی میدان میں انقلابی تبدیلیاں لائی ہیں۔
پنجاب یونیورسٹی کے ہیڈ آف ایجوکیشن، پروفیسر ڈاکٹر عبد القیوم، نے تقریب کے کامیاب انعقاد میں اہم کردار ادا کیا اور پنجاب گورنمنٹ کی جانب سے مہمانوں کو مدعو کرنے پر ان کا شکریہ ادا کیا۔ انہوں نے کہا کہ یونیورسٹی ملک کی تعلیمی ترقی میں کلیدی کردار ادا کر رہی ہے اور اس طرح کی تقریبات طلبہ کو مزید محنت کرنے کی تحریک دیتی ہیں۔
تقریب کے اختتام پر، مہمانوں نے طلبہ کے ساتھ تصاویر بنوائیں اور تعلیمی میدان میں ان کی جدوجہد کو سراہا۔ حاضرین نے اس تقریب کو تعلیم کے فروغ کے لیے ایک اہم قدم قرار دیا اور امید ظاہر کی کہ یہ سلسلہ جاری رہے گا۔
مزید پڑھیں: سکولوں کے بعد کالجز میں بھی موسم سرما کی چھٹیوں کا اعلان
