اسلام آباد(روشن پاکستان نیوز) آئینی ترامیم مؤخر کر دی گئیں ، جس کی تصدیق مسلم لیگ ن کے سینیٹر عرفان صدیقی نے کر دی۔
پارلیمنٹ ہاؤس کے باہر میڈیا سے گفتگو کرتے ہوئے عرفان صدیقی کا کہنا تھا کہ ترمیم آنے میں ہفتہ دس دن بھی لگ سکتے ہیں، ترمیم نہیں بھی آئی تو کوئی قیامت نہیں آجائے گی۔
انہوں نے کہا کہ آئینی ترمیم ہو جائے گی اس میں کوئی رکاوٹ نظر نہیں آتی، مولانا فضل الرحمان نے وقت مانگا ہے، وہ بہت ساری چیزوں پر مطمئن تھے، مسودے میں کچھ نکات پر اتفاق کا مسئلہ ہے جو ہر فریق کا حق ہے۔
انہوں نے مزید کہا کہ آئینی مسودہ کبھی پبلک نہیں ہوتا، پہلے یہ ایوان میں پیش ہوتا ہے، قانون مطلوبہ اکثریت مانگتا ہے، ہمارے نمبرز پورے ہیں۔
مزید پڑھیں: آئینی ترامیم پرڈیڈلاک،سینیٹ اورقومی اسمبلی کے اجلاس موخر
عرفان صدیقی کا کہنا تھا کہ قومی اسمبلی کے نئے سیشن میں ترامیم آ جائیں گی۔ کمیٹی میں کوئی کسی کا محتاج نہیں تھا۔ پی ٹی آئی ارکان کے پاس ضمانت دینے کے لئے کوئی اتھارٹی نہیں تھی۔ پی ٹی آئی والے یہاں متفق ہو کر اڈیالہ چلے بھی جائیں اور بانی پی ٹی آئی کہے میں نہیں مانتا تو بات ختم ہو جائے گی۔ پی ٹی آئی کی مجبوری ہم سمجھتے ہیں۔
