لاہور(روشن پاکستان نیوز) وزیراعلیٰ پنجاب مریم نواز کے ویژن ڈیجیٹل پنجاب کے تحت آن لائن رہائشی بلڈنگ پلان کی منظوری کا آغاز کردیا گیا۔
تفصیلات کے مطابق وزیر اعلیٰ مریم نواز شریف کی ہدایت پر لاہور ڈیولپمنٹ اتھارٹی میں آن لائن رہائشی بلڈنگ پلان کی منظوری کا آغاز کردیا گیا ہے، شہری ایل ڈی اے سے گھر بیٹھے آن لائن رہائشی نقشوں کی منظوری کرا سکتے ہیں۔
نقشے کی منظوری کی درخواست، نقشہ اپ لوڈ کرنے، پراسسنگ اور چالان کا عمل سب آن لائن ہو گا، اعتراض کی صورت میں درستگی اور منظور شدہ نقشہ ڈاؤن لوڈ کیا جا سکے گا۔
رہائشی بلڈنگ پلان کی منظوری کے لیے شہریوں کو اب ایل ڈی اے دفتر آنے کی ضرورت نہیں، شہری ایل ڈی اے موبائل ایپ اور ویب سائٹ lda. Gop. Pk پر جاکر اپلائی کر سکتے ہیں۔
اس موقع پر وزیراعلی مریم نوازشریف نے کہا کہ ایل ڈی اے میں ڈیجیٹل ریفارمز کا سلسلہ تیزی سے جاری ہے، پنجاب بھر کے اداروں کو ماڈرن لائنز پر ڈیجیٹلائز بنا رہے ہیں، شہریوں کو طویل قطاروں میں کھڑے ہو کر انتظار نہیں کرنا پڑے گا-
مزید پڑھیں: راولپنڈی پولیس کی جانب سے گرجا گھروں کی سیکورٹی کے لیے موثر انتظامات
انھوں نے کہا کہ دستک پائلٹ پراجیکٹ کے بہترین رزلٹ مل رہے ہیں، بتدریج دائرہ کار کو وسعت دیں گے، سرکاری محکموں میں فائل کلچر کو ختم کر رہے ہیں، آئی ٹی بیسڈ ریفارمز سے شہریوں کو ایجنٹ مافیا اور کرپشن سے نجات ملے گی۔
