ریاض (وقار نسیم وامق) الف انٹرنیشنل سکول ریاض نے ایک شاندار اور تاریخی کامیابی حاصل کرتے ہوئے گنیز ورلڈ ریکارڈ میں اپنا نام درج کروا لیا ہے۔ سکول نے سب سے بڑے تخلیقی تحریری پروگرام کا کامیاب انعقاد کیا جسے “بُک بلوم 500” کا عنوان دیا گیا۔ اس موقع پر ایک ہی اسٹیج پر 506 طلبہ کی تحریر کردہ کتابیں منظرِ عام پر لائی گئیں۔
اس ریکارڈ کی تصدیق تقریب میں موجود گنیز ورلڈ ریکارڈ کے سرکاری نمائندے نے کی جنہوں نے باضابطہ طور پر سرٹیفکیٹ پیش کیا۔ اس منفرد پروگرام میں جماعت اول سے دہم تک کے طلبہ نے شرکت کی۔ طلبہ کی تحریریں دس مختلف ادبی اصناف پر مشتمل تھیں اور یہ کتابیں مختلف زبانوں میں تحریر کی گئیں جن میں انگریزی، عربی، ہندی، اردو، ملیالم، کنڑا اور تمل زبانیں شامل ہیں۔
معروف میڈیا تجزیہ کار اور سابق چیف ایڈیٹر عرب نیوز اور سعودی گزٹ، استاد خالد المعیناء نے اس پروگرام کا افتتاح کیا اور نئی نسل میں ادبی صلاحیتوں کو فروغ دینے کے لیے سکول کی کوششوں کو سراہا۔
سعودی شاہ سلمان کی زیرصدارت اجلاس بجلی کے شعبے میں پاک سعودی مفاہمتی یادداشت کی منظوری
اس تقریب میں تعلیمی، سماجی اور کاروباری شعبوں سے تعلق رکھنے والی ممتاز شخصیات نے شرکت کی۔ استاد علی عبدالرحمٰن (چیئرمین، الف گروپ آف سکولز)، لقمان احمد (سی ای او، الف گروپ آف سکولز) اور محمد مصطفیٰ (پرنسپل) نے خطاب کرتے ہوئے اس بات پر فخر کا اظہار کیا کہ سکول نے معاشرے کو سینکڑوں کم عمر مصنفین پیش کیے اور تخلیقی تعلیم میں ایک نیا سنگِ میل عبور کیا۔
اس موقع پر عبدالناصر حاجی (اسٹرونگ لائٹ)، ڈائریکٹر الف گروپ آف سکولز، اور محمد احمد، ڈائریکٹر الف گلوبل سکول بھی موجود تھے۔
پرنسپل محمد مصطفیٰ نے سکول کے “ریڈ اینڈ ریجوائس” پروگرام پر روشنی ڈالی، جو سکول کے نعرے “مسکراتا ہوا سکول” کے تحت ایک خوابیدہ منصوبہ ہے، جس کا مقصد تعلیم کو خوشگوار سفر بنانا ہے۔
سی ای او لقمان احمد نے کہا کہ یہ پروگرام طلبہ کو کتابوں سے دوستی سکھاتا ہے، جو ان کی سوچ کو نکھارتی، زبان کو بہتر بناتی، ذہن کو سکون دیتی اور جذباتی ذہانت میں اضافہ کرتی ہیں۔
اس کامیاب پروگرام کے انعقاد میں سکول ایڈمنسٹریٹر علی بخاری، ہیڈماسٹر نوشاد نالاکتھ اور کوآرڈینیٹر سندس صابر چوہدری صاحبہ سمیت دیگر اہم عہدیداران نے کلیدی کردار ادا کیا۔
