ریاض (وقار نسیم وامق) سعودی عرب میں عالمی ادبی تنظیم حلقہء فکر و فن کے سیکرٹری جنرل ڈاکٹر طارق عزیز کے اعزاز میں الوداعی تقریب کا اہتمام کیا گیا جس میں رکن پنجاب اسمبلی ملک فلک شیر اعوان سمیت مختلف مکاتبِ فکر کے افراد شریک ہوئے۔
سعودی عرب کے دارالحکومت ریاض میں عالمی حلقہء فکر و فن کی جانب سے مہمانِ خصوصی ڈاکٹر طارق عزیز کے اعزاز میں منعقدہ الوداعی تقریب کی صدارت مشیرِ اعلیٰ عالمی حلقہء فکروفن شیخ محمد ارشد نے کی جبکہ اس موقع پر مہمانانِ اعزازی سابق رکن قومی اسمبلی چوہدری نذیر احمد جٹ، ممبر پنجاب اسمبلی ملک فلک شیر اعوان، پرنسپل پاکستان انٹرنیشل سکول راجہ محمد عرفان، قومی ائیرلائن پی آئی اے ریاض کے مینجر بلال احمد سمیت عالمی حلقہء فکروفن کے سنیئر نائب صدر بابائے ریاض قاضی محمد اسحاق میمن موجود تھے جبکہ نظامت کے فرائض وقار نسیم وامق نے سرانجام دئیے۔
حلقہء فکروفن کے صدر وقار نسیم وامق، وائس چیئرمین عدنان اقبال بٹ، مخدوم امین تاجر، ڈاکٹر محمود باجوہ، رانا عبدالرؤف، وسیم ساجد، محمد خالد رانا، ثاقب زبیر، رانا عمر فاروق، بشیر احمد چوہدری سمیت دیگر کا کہنا تھا کہ سعودی عرب میں شعر و سخن کی محافل میں ڈاکٹر طارق عزیز نے اپنی نثر نگاری سے منفرد مقام حاصل کیا انکی خدمات کو کبھی فراموش نہیں کیا جاسکتا۔
تقریب سے خطاب کرتے ہوئے یعقوب سیفی، میاں ساجد مشتاق، ذیشان قاضی، اعجاز رحیم، ذکاء اللہ محسن، الیاس رحیم، اجمل منہاس، راجہ گل زیب کیانی، ابراہیم جٹ، جی ایم اعوان، طلحہ ظہیر اور دیگر شرکاء کا کہنا تھا کہ سعودی عرب میں اردو ادب کی خدمت میں ڈاکٹر طارق عزیز کا نام ہمیشہ سنہرے حروف میں لکھا جائے گا انہوں نے جہاں میڈیکل کے شعبے میں اپنی صلاحیتوں کو منوا کر پاکستان کا نام روشن کیا وہیں اردو ادب کی ترویج کا فریضہ بھی سرانجام دیا۔
تقریب میں معروف شعراء کرام قلبِ عباس، سید طیب رضا کاظمی، کامران حسانی، ضواق علی ذکی، وقار نسیم وامق اور دیگر نے اپنا منظوم کلام نذرِ طارق عزیز کرتے ہوئے انہیں بھرپور خراجِ تحسین پیش کیا۔
تقریب سے خطاب کرتے ہوئے ڈاکٹر طارق عزیز کا کہنا تھا کہ سعودی عرب میں 18 سال کے دوران پاکستانی کمیونٹی سے جہاں مخلص رشتے استوار ہوئے وہیں سعودی عوام سے بھی محبت اور پیار ملا جس کو وہ کبھی بھول نہیں پائیں گے۔ انہوں نے عالمی حلقہء فکر و فن کی ادبی خدمات کو سراہتے ہوئے اسے سنیئر شعراء و ادباء سمیت نئے لکھاریوں کے لئے بہترین نمائندہ پلیٹ فارم قرار دیا۔
اس موقع پر عالمی حلقہء فکروفن کی جانب سے ڈاکٹر طارق عزیز کی علمی و ادبی خدمات کے اعتراف میں اعزازی شیلڈ پیش کی گئی جبکہ بابائے ریاض قاضی محمد اسحاق میمن کی جانب سے سندھی اجرک کا روایتی تحفہ، پی آئی اے ریاض ریجن کے مینجر بلال احمد کی جانب سے سؤینئیر، پیپلز پارٹی کے وسیم ساجد اور گکھڑ فیڈریشن کے راجہ گل زیب کیانی کی جانب سے بھی تحائف پیش کئے گئے جبکہ شرکائے تقریب کے اعزاز میں پرتکلف عشائیہ دیا گیا۔
