اسلام آباد(روشن پاکستان نیوز) فیصل بینک لمیٹڈ (ایف بی ایل)، جو پاکستان کے معتبر اسلامی بینکوں میں شمار ہوتا ہے، نے “فیصل اسلامک ریمیٹنس آگاہی پروگرام” کا آغاز کیا ہے۔ یہ ایک ملک گیر روڈ شو ہوگا جس کے تحت پاکستان میں قانونی ترسیلات زر کے مختلف ذرائع کے بارے میں آگاہی فراہم کی جائے گی۔ یہ پروگرام اسٹیٹ بینک آف پاکستان کے پاکستان ریمیٹنس انیشی ایٹو (پی آر آئی) کے تعاون سے منعقد کیا جا رہا ہے۔ اس کا مقصد ترسیلات زر کے معیشت پر مثبت اثرات کو اجاگر کرنا، غیر قانونی ذرائع کا استعمال کم کرنا اور فنڈز کی تیز اور مؤثر ترسیل کو یقینی بنانا ہے۔
پروگرام کی پہلی تقریب منڈی بہاالدین میں منعقد کی گئی، جس میں اسٹیٹ بینک آف پاکستان کے پاکستان ریمیٹنس انیشی ایٹو (پی آر آئی) کے سینیئر حکام نے شرکت کی۔ اس کے علاوہ ملک بھر میں مزید تقریبات کا بھی انعقاد کیا جائے گا تاکہ اس پروگرام کو وسعت دی جا سکے۔
فیصل بینک کے ہیڈ- گلوبل ہوم ریمیٹنس، زیاد افتاب اعجاز نے اس موقع پر کہا، “ہم فیصل بینک میں اس بات سے بخوبی آگاہ ہیں کہ قانونی اور محفوظ ترسیلات زر کے ذرائع کے بارے میں آگاہی فراہم کرنے میں کئی چیلنجز کا سامنا ہوگا، جن میں محدود معلومات اور غیر رسمی طریقوں پر انحصار شامل ہیں۔ فیصل اسلامک ریمیٹنس آگاہی پروگرام کے ذریعے ہم ان مسائل کے حل کے لیے پرعزم ہیں اور ہمارا مقصد ہے کہ کمیونٹیز کو قانونی ریمیٹنس چینلز کے فوائد پر تربیت فراہم کریں۔” انہوں نے مزید کہا کہ یہ اقدام پاکستان کی معیشت کو سہارا دینے اور بیرون ملک مقیم پاکستانیوں اور ان کے خاندانوں کے لیے محفوظ اور مؤثر ترسیلات کو یقینی بنانے کے لیے ہے۔
یہ پروگرام فیصل بینک کے وسیع تر وژن کے مطابق ہے، جو مالی شمولیت کو فروغ دینے اور پائیدار قومی اقتصادی ترقی کے لیے محفوظ اور قابل اعتماد ریمیٹنس سلوشنز فراہم کرنے کے عزم پر مرکوز ہے۔ تقریب کے دوران مختلف سیشنز کا انعقاد کیا گیا اور فیصل بینک کی ریمیٹنس سروسز استعمال کرنے والوں کو پرفارمنس ایوارڈز دیے گئے۔
مزید پڑھیں: موریطانیہ: خواتین کا مخصوص مارکیٹ میں کاروبار، معاشرتی اور اخلاقی سوالات
فیصل بینک کا یہ اقدام پاکستان کے اقتصادی استحکام کے لیے اہم قدم ہے، جو نہ صرف قانونی ترسیلات زر کو فروغ دے گا بلکہ عالمی سطح پر پاکستان کی معیشت کو مزید مستحکم کرے گا۔
