ممبئی (روشن پاکستان نیوز) بالی ووڈ انڈسٹری کے معروف کامیڈی اداکار جانی لیور نے اپنی زندگی سے متعلق اہم انکشاف کیا ہے۔
ایک بھارتی پوڈ کاسٹ سے بات کرتے ہوئے جونی لیور نے اپنی زندگی کے ایک مشکل وقت کو یاد کرتے ہوئے کہا کہ انہیں بچپن میں بہت سی مشکلات کا سامنا کرنا پڑا۔
اداکار کا کہنا تھا کہ وہ ایک غریب گھرانے سے تعلق رکھتے ہیں جہاں مالی مسائل بہت تھے اور ان کے والد بھی بہت سخت تھے، والد کے رویے سے تنگ آکر انہوں نے 13 سال کی عمر میں خودکشی کی کوشش کی۔
جونی لیور کا کہنا تھا کہ وہ اپنے والد کے رویے سے تنگ آکر ٹرین کی پٹریوں پر لیٹ گئے لیکن جب انہوں نے اپنی بہنوں کے آنسو دیکھے تو وہ کھڑے ہوگئے۔
انہوں نے مزید کہا کہ بچپن میں کئی قتل دیکھے ہیں، اگر وہ اداکار نہ ہوتے تو جرائم کی دنیا میں ہوتے۔
اداکار نے کہا کہ وہ انڈسٹری کے ہمیشہ شکر گزار رہیں گے کہ انہیں کام دیا ورنہ وہ گینگسٹر ہی رہتے۔
