اسلام آباد(روشن پاکستان نیوز) پاکستان بھر میں پہلا روزہ ہفتہ یکم مارچ کو ہوگا یا اتوار 2 مارچ کو؟اعلان آج ہوجائےگا۔
ترجمان وزارت مذہبی امورکے مطابق مرکزی رویت ہلال کمیٹی کا اجلاس پشاور میں جاری ہے،چیئرمین مرکزی رویت ہلال کمیٹی مولانا عبدالخبیر آزاد اجلاس کی صدارت کررہے ہیں۔
پنجاب:
لاہورمیں رمضان المبارک کاچاند دیکھنےکیلئےصوبائی زونل رویت ہلال کمیٹی کااجلاس جاری ہے،اجلاس کی صدارت ڈی جی مذہبی امور خالد محمود کر رہے ہیں،محکمہ اوقاف اورصوبائی زونل رویت ہلال کمیٹی کےممبران چانددیکھنےکیلئےموجود ہیں۔
محکمہ موسمیات کے مطابق آسمان پر بادلوں کے باعث چاند نظر آنے کےامکانات کم ہیں،چاند نظر آنے یا نہ آنے کا حتمی فیصلہ مرکزی رویت ہلال کمیٹی کرے گی۔
خیبر پختونخوا:
پشاورمیں رمضان المبارک کا چاند دیکھنے کے لیے عید گاہ میں انتظامات مکمل کرلئے گئے ہیں، ٹیلی سکوپ اور ایچ ٹی ایس سسٹم فعال ہیں،محکمہ موسمیات اور سپارکو کی ٹیمیں بھی موجود ہیں۔
سندھ:
محکمہ موسمیات کراچی میں رمضان المبارک کا چاند دیکھنے کے لئے زونل کمیٹی کا اجلاس شروع ہوگیا ہے،اجلاس کی صدارت علامہ حافظ محمد سلفی کررہے ہیں۔
اجلاس میں زونل کمیٹی کے ممبران، ڈائریکٹر نیشنل سونامی سینٹر امیر حیدر لغاری اور محکمہ موسمیات سے دیگر شریک ہیں۔
فوکل پرسن محکمہ موسمیات کراچی انجم نذیر ضیغم کے مطابق آج رمضان المبارک کا چاند نظر آنے کے امکانات کم ہیں،وسطی اور بالائی سندھ، جنوبی پنجاب، جنوبی خیبرپختونخوا، وسطی اور شمال مشرقی بلوچستان میں مطلع صاف ہے،کراچی سمیت ساحلی پٹی پر مطلع جزوی ابر آلود ہے،یکم رمضان المبارک 2 مارچ کو ہونے کا قوی امکان ہے۔
بلوچستان:
رمضان المبارک کا چاند دیکھنے کے لئے زونل کمیٹی کا اجلاس جاری ہے، اجلاس کی صدارت مولانا انوار الحق حقانی کررہے ہیں،محکمہ موسمیات کا کہنا ہے کوئٹہ سمیت بلوچستان کے مختلف علاقوں میں مطلع صاف ہے، جبکہ بلوچستان کے کچھ علاقوں میں مطلع جزوی طور پر آبر آلو ہے۔
آج کوئٹہ میں رمضان المبارک کا چاند نظر آنے کے امکانات کم ہیں ،کوئٹہ میں چاند نظر آنے کا وقت 6 بج کر 59 سے لے کر 7 بجکر 7 منٹ تک ہے۔
اسلام آباد:
وفاقی دارالحکومت میں زونل رویت ہلال کمیٹی کے ارکان وزارت مذہبی امور کی چھت پر موجود ہیں،کمیٹی کے شرکاء میں علامہ سجاد حسین نقوی، مفتی عبدالسلام جلالی اور مفتی محمد اقبال نعیمی شامل ہیں۔
کمیٹی ارکان علامہ ہارون الرشید بالاکوٹی، پیر محمد ممتاز احمد ضیاء نظامی بھی چاند دیکھنے کے لیے موجود ہیں،محکمہ موسمیات، سپارکو، وزارت سائنس و ٹیکنالوجی اور دیگر متعلقہ اداروں کے حکام بھی موجود ہیں۔
مزید پڑھیں: سعودی عرب میں یوتھ فورم کے زیراہتمام “رمضان اور نوجوان” کے عنوان سے استقبالِ رمضان یوتھ کنونشن کا انعقاد
سپارکو:
ترجمان سپارکو کے مطابق نئے چاند کی پیدائش آج صبح5 بج کر 45 منٹ پر ہوئی،آج غروب افتاب کے وقت چاند کی عمر 12 گھنٹے ہوگی،28فروری کو غروب آفتاب کے وقت چاند کی عمر 12 گھنٹے اور بلندی 5 ڈگری ہو گی۔
چاند کی کم بلندی اور فاصلے کی وجہ سے ہلال کا نظر آنا مشکل ہے،آج چاند اور سورج کا زاویائی فاصلہ 7 ڈگری، ہلال انسانی آنکھ سے نظر نہیں آئے گا۔
یکم مارچ کو کہاں کہاں پہلا روزہ ہوگا؟
آسٹریلیا، روس اور نیوزی لینڈ میں میں پہلا روزہ یکم مارچ یعنی کل ہوگا،آسٹریلوی وزیر اعظم نے رمضان کے آغاز پر نیک تمنائوں کا اظہارکیا ہے۔
2 مارچ کو کہاں کہاں پہلا روزہ ہوگا؟
ملائیشیا،برونائی دارالاسلام اورانڈونیشیا، سنگا پورمیں یکم رمضان دو مارچ کو ہوگا۔
سعودی عرب:
سعودی عرب میں رمضان المبارک کا چاند آج دیکھا جائے گا،دارالحکومت ریاض ریجن سمیت دیگر علاقوں میں رویت ہلال کمیٹیوں کے اجلاس منعقد ہورہے ہیں۔
القری کیلنڈر کے حساب سے آج شعبان کی 29 تاریخ ہے،سعودی اور غیر ملکیوں سے رمضان کا چاند دیکھنے کی اپیل کی گئی ہے۔
سعودی محکمہ فلکیات کے مطابق رمضان المبارک کا چاند نظر آنے کے آج قوی امکانات ہیں،رمضان المبارک کا چاند مختلف علاقوں میں دیکھائی دے گا۔
پہلا روزہ یکم مارچ بروز ہفتہ کو ہوگا،چاند دیکھنے کی گواہی ملنے کے بعد ہی سرکاری سطح پر اس کا اعلان کیا جائے گا۔
متحدہ عرب امارات:
متحدہ عرب امارات رمضان المبارک کا چاند دیکھنے کے لیے ڈرونز کا استعمال کرے گا، عرب میڈیا کے مطابق یو اے ای ڈرونز کے ذریعے چاند دیکھنے والا دنیا کا پہلا ملک ہو گا۔
ڈرونز مصنوعی ذہانت ٹیکنالوجی سے لیس ہوں گے،آج چاند نظر آنے یا نا آنے کی صورت میں متحدہ عرب امارات میں یکم رمضان شروع ہونے کا سرکاری اعلان کیا جائے گا۔
