کراچی (میاں خرم شہزاد) – حکومت سندھ نے فزیکل ان فٹ گاڑیوں کے خلاف سخت کریک ڈاؤن کا فیصلہ کیا ہے۔ اس سلسلے میں سینئر وزیر شرجیل انعام میمن نے سندھ بھر میں موٹر وہیکل انسپیکشن (ایم وی آئی) سینٹرز کے قیام کو تیز کرنے کی ہدایات جاری کر دی ہیں۔
موٹر وہیکل انسپیکشن کے موثر نفاذ کے حوالے سے ایک اہم اجلاس وزیر اعلیٰ سندھ کی زیر صدارت ہوا جس میں سیکریٹری ٹرانسپورٹ اسد ضامن، ایم ڈی سندھ ماس ٹرانزٹ اتھارٹی کمال دایو، سیکریٹری پی ٹی اے اوکاش میمن اور دیگر اعلیٰ حکام نے شرکت کی۔ اجلاس میں وزیر اعلیٰ سندھ نے واضح طور پر ہدایات دیں کہ ایک ماہ کے اندر ایم وی آئی نظام اور وہیکل رجسٹریشن کو مکمل طور پر فعال کیا جائے تاکہ سڑکوں کی حفاظت اور ٹریفک کے قوانین کی صحیح طریقے سے تعمیل ہو سکے۔
شرجیل انعام میمن نے کہا کہ ہیوی گاڑیوں جیسے ڈمپرز، ٹرک، بسیں اور ٹریلرز کے لیے موٹر وہیکل انسپیکشن لازمی قرار دی گئی ہے۔ اس کے علاوہ کراچی میں چار مقامات پر ایم وی آئی سینٹرز قائم کیے جائیں گے جبکہ حیدرآباد، سکھر، لاڑکانہ، میرپورخاص اور شہید بینظیر آباد ڈویژنز میں بھی ایم وی آئی سینٹرز قائم کیے جائیں گے۔
مزید پڑھیں: صحافیوں کے پلاٹس پر 80 فیصد سندھ حکومت کی ادائیگی اور ترقیاتی کاموں کے لئے تمام اقدامات مکمل
انہوں نے مزید کہا کہ گاڑیوں کی فٹنس سرٹیفکیٹ نہ رکھنے والی گاڑیوں کے خلاف سخت کارروائی کی جائے گی اور جعلی فٹنس سرٹیفکیٹ رکھنے والوں کے خلاف مقدمات درج کر کے انہیں جیل بھیجا جائے گا۔ اس اقدام کا مقصد سڑکوں پر گاڑیوں کی حفاظت کو یقینی بنانا اور ٹرانسپورٹ کے شعبے کو جدید خطوط پر استوار کرنا ہے۔
