اسلام آباد (سٹی رپورٹر) آڈیٹر جنرل آف پاکستان کے دفتر نے اعلان کیا ہے کہ پاکستان 2024 سے 2027 کی مدت کے لیے ایشین آرگنائزیشن آف سپریم آڈٹ انسٹیٹیوشنز (AOSAI) کے گورننگ بورڈ کا رکن منتخب ہو گیا ہے۔ یہ انتخاب 16 ویں ایسوسائی اسمبلی کے انتخابات کے ذریعے کیا گیا، جس کی میزبانی بھارت کے شہر نیودہلی کے آڈٹ آفس نے کی۔
آڈیٹر جنرل آفس کے اعلامیہ کے مطابق، AOSAI کی گورننگ باڈی میں شامل ہونا پاکستان کے لیے ایک بڑا اعزاز ہے۔ یہ انتخاب ملک کی آڈٹ کی مہارت کو عالمی سطح پر بہتر بنانے میں اہم کردار ادا کرے گا۔ انتخابی عمل آن لائن فاصلاتی طریقے سے انجام دیا گیا۔
آڈیٹر جنرل آف پاکستان نے پاکستانی وفد کی قیادت کی جو 24 سے 27 ستمبر تک نئی دہلی میں ہونے والی AOSAI کی 16 ویں اسمبلی میں شریک ہوا۔ انہوں نے کہا کہ یہ کامیابی ملک کی نمائندگی اور آڈٹ کی مہارت میں بہتری کی علامت ہے۔
اعلامیہ میں مزید کہا گیا ہے کہ پاکستان کی گورننگ بورڈ میں شمولیت ایشیائی خطے میں بہتر آڈٹ پریکٹسز کو فروغ دینے میں مددگار ثابت ہوگی۔ یاد رہے کہ AOSAI میں 47 ایشیائی ممالک کے سپریم آڈٹ ادارے شامل ہیں، اور گورننگ بورڈ اس تنظیم کی پالیسیوں کو نافذ کرنے اور سالانہ بجٹ کی منظوری دینے میں اہم کردار ادا کرتا ہے۔
