کیلیفورنیا(روشن پاکستان نیو) گوگل کے زیر انتظام دنیا کی سب سے بڑی ویڈیو شیئرنگ ایپلیکیشن یوٹیوب نے صارفین کے تجربے کو مزید بہتر اور دلچسپ بنانے کے لیے ایک نیا فیچر متعارف کرا دیا۔
غیر ملکی خبر رساں ایجنسی کے مطابق یوٹیوب کے متعارف کرائے گئے نئے فیچر کا مقصد شارٹس بنانے کے عمل کو مزید آسان بنانا اور مواد تخلیق کرنے والوں کو جدید سہولیات فراہم کرنا ہے۔
یوٹیوب نے ایپ میں ایک نیا کریئٹ موڈ متعارف کرایا ہے۔ جو پلس آئیکون پر کلک کرتے ہی فعال ہو جاتا ہے۔ اس موڈ کے ذریعے صارفین کو تصاویر، ویڈیو کلپس، گرین اسکرین بیک گراؤنڈز، میوزک ٹریکس اور دیگر تخلیقی ٹولز تک براہ راست رسائی حاصل ہو گی۔ جس سے شارٹس تیار کرنا پہلے سے کہیں زیادہ آسان ہو جائے گا۔
رپورٹ کے مطابق نئے کریئٹ موڈ میں اے آئی پر مبنی ٹولز بھی شامل کیے گئے ہیں۔ جو صارفین کو تخلیقی عمل میں مدد فراہم کریں گے۔ تاہم گوگل کی جانب سے ابھی یہ واضح نہیں کیا گیا۔ کہ یہ اے آئی ٹولز کس حد تک تصاویر یا ویڈیوز بنانے میں معاون ثابت ہوں گے۔
امکان ظاہر کیا جا رہا ہے کہ صارفین تحریری ہدایات یا پرومپٹس کے ذریعے مطلوبہ مواد تیار کر سکیں گے۔ یہ نیا موڈ مکمل طور پر نیا تجربہ نہیں۔ کیونکہ یوٹیوب ایپ میں پہلے بھی کچھ تجرباتی اے آئی فیچرز موجود رہے ہیں۔ جنہیں ویڈیوز اور تصاویر بنانے کے لیے استعمال کیا جا سکتا تھا۔ امکان ہے کہ کریئٹ موڈ میں یہی فیچرز مزید بہتر انداز میں شامل کیے گئے ہوں۔
فی الحال یہ نیا کریئٹ موڈ محدود صارفین کے لیے دستیاب ہے۔ اور کمپنی کا مقصد شارٹس بنانے کے لیے نئے اور آسان طریقوں کی آزمائش کرنا ہے۔
یہ بھی پڑھیں: معروف یوٹیوبر ڈکی بھائی نے قوم سے معافی مانگ لی
ماہرین کے مطابق یہ اقدام یوٹیوب کی جانب سے دیگر مختصر ویڈیو پلیٹ فارمز کے ساتھ مقابلے کو مضبوط بنانے اور تخلیق کاروں کو مزید سہولت فراہم کرنے کی حکمت عملی کا حصہ ہے۔
