مظفرآباد(روشن پاکستان نیوز) کشمیر انٹرنیشنل تنظیم کے چیئرمین راجہ سکندر خان اور صدر کالا خان، جو ڈائیسپورا اور تھنک ٹینک گلوبل پاک کشمیر سپریم کونسل کی نمائندگی کر رہے ہیں، نے آزاد کشمیر کی موجودہ کشیدہ صورتحال پر مشترکہ بیان جاری کیا ہے۔
رہنماؤں نے کہا کہ جوائنٹ عوامی ایکشن کمیٹی کے چارٹر آف ڈیمانڈز میں کوئی حرج نہیں ہے اور یہ مطالبات بات چیت کے ذریعے حل کیے جا سکتے ہیں۔ انہوں نے کہا کہ پورے آزاد کشمیر میں تعطل کی کوئی ضرورت نہیں اور معصوم جانوں کے ضیاع پر گہرا دکھ اور افسوس ہے۔ انہوں نے لواحقین کے ساتھ دلی ہمدردی کا اظہار کیا اور کہا کہ مکالمے کے ذریعے ایسے افسوسناک واقعات سے بچا جا سکتا تھا۔
راجہ سکندر خان اور کالا خان نے میڈیا رپورٹس کے حوالے سے بتایا کہ 38 چارٹر آف ڈیمانڈز میں سے کم از کم 35 پر اتفاق کیا جا چکا ہے، لہٰذا جوائنٹ عوامی ایکشن کمیٹی کو باقی مطالبات پر غور و فکر کے لیے حکومت کو مزید وقت دینا چاہیے تھا۔ انہوں نے حکومت کی جانب سے انٹرنیٹ اور ٹیلی فون سروسز بند کرنے کی شدید مذمت کی اور کہا کہ اس اقدام سے بیرون ملک مقیم کمیونٹی اپنے پیاروں سے رابطہ قائم نہیں کر پا رہی، جس سے گہری تشویش پیدا ہوئی ہے۔
رہنماؤں نے مطالبہ کیا کہ فوری طور پر انٹرنیٹ اور موبائل ٹیلی فون سروسز بحال کی جائیں تاکہ کمیونیکیشن کا سلسلہ دوبارہ شروع ہو سکے۔ ساتھ ہی انہوں نے جوائنٹ عوامی ایکشن کمیٹی اور حکومتی عہدیداروں سے اپیل کی کہ وہ مسائل کو خوش اسلوبی سے بات چیت کے ذریعے جلد از جلد حل کریں۔
آخر میں، انہوں نے ان تمام شہداء کے اہل خانہ کے ساتھ ہمدردی کا اظہار کیا جنہوں نے کشمیر کے مستقبل کی بہتری کے لیے اپنی جانیں قربان کیں۔ دعا کی گئی کہ اللہ تعالیٰ شہداء کی روح کو جوار رحمت میں جگہ دے اور لواحقین کو صبر جمیل عطا فرمائے۔
