آزاد جموں و کشمیر (روشن پاکستان نیوز) — پاکستان پیپلز پارٹی میں شمولیت اختیار کرنے والے ملک باسط اعوان کے اعزاز میں ضلع سدھنوتی کے علاقے بلوچ بیٹھک میں ایک عظیم الشان ویلکم ریلی کا انعقاد کیا گیا، جو سیاسی لحاظ سے ایک تاریخی موقع بن گیا۔
اس شاندار ریلی میں 500 سے زائد موٹر سائیکلیں، 1000 سے زائد گاڑیاں اور پانچ ہزار سے زائد افراد نے شرکت کی، جس نے علاقے میں ایک نئی سیاسی تاریخ رقم کی۔ ریلی میں قلعہ ترالخل، تالا باڑی، منوٹا، نالہ پلندری سمیت حلقے کے ہر کونے سے عوام کی بھرپور شرکت دیکھنے میں آئی، جنہوں نے پرجوش نعروں اور خیرمقدمی بینرز کے ذریعے ملک باسط اعوان کا پرتباک استقبال کیا۔
یہ ملک باسط اعوان کی پیپلز پارٹی میں شمولیت کے بعد پہلا بڑا عوامی مظاہرہ تھا، جس میں محمد اشتیاق کیانی نے ان کے شانہ بشانہ کھڑے ہونے کا اعلان کیا۔ اس موقع پر علاقے کی ممتاز شخصیات، تمام برادریوں کے نمائندے، نوجوان، بزرگ، اور خواتین کی بڑی تعداد موجود تھی۔
اپنے خطاب میں ملک باسط اعوان نے کہا:
“یہ محض ایک چھوٹی سی کال تھی، لیکن عوام کی محبت نے اسے تاریخ کی سب سے بڑی ریلی میں بدل دیا۔ میں حلقے کی 32 برادریوں سے وعدہ کرتا ہوں کہ ان سب کے ساتھ اپنی ذاتی برادری سمجھ کر کھڑا رہوں گا۔”
انہوں نے مزید کہا:
“سیاست میں آنے کا واحد مقصد عوامی خدمت ہے۔ روٹی، کپڑا اور مکان ہر شہری کا بنیادی حق ہے، اور میں اپنی تمام تر توانائیاں اپنے علاقے کی خدمت کے لیے وقف کروں گا۔”
ملک باسط اعوان کا کہنا تھا:
“مجھے پارٹی ٹکٹ ملے یا نہ ملے، میں جیتوں یا ہاروں، عوام کی محبت ہی میری اصل کامیابی ہے۔”
ریلی سے خطاب کرتے ہوئے محمد اشتیاق کیانی نے مکمل حمایت کا اعلان کرتے ہوئے کہا:
“ہم اپنی پوری برادری کے ساتھ ملک باسط اعوان کے ساتھ کھڑے ہیں۔”
اسی طرح ایس ڈی او اشفاق کیانی نے بھی مکمل تعاون کی یقین دہانی کرواتے ہوئے کہا:
“میں اور میری برادری ملک باسط کے شانہ بشانہ کھڑے ہیں اور ہر فورم پر ان کی بھرپور معاونت کریں گے۔”
آخر میں ملک باسط اعوان نے تمام برادریوں، دوستوں، نوجوانوں، بزرگوں، اور کارکنان کا دل کی گہرائیوں سے شکریہ ادا کیا جنہوں نے اس ریلی کو ایک تاریخی کامیابی میں بدل دیا۔
