اسلام آباد(عرفان حیدر) اینٹی نارکوٹکس فورس (اے این ایف) نے ملک کے مختلف شہروں میں منشیات اسمگلنگ کے خلاف کارروائیاں کرتے ہوئے خاتون سمیت دو ملزمان کو گرفتار کر لیا۔ کارروائیوں کے دوران 77 لاکھ روپے سے زائد مالیت کی 33.62 کلوگرام منشیات برآمد کی گئی۔
اے این ایف کے مطابق تین مختلف کارروائیاں کی گئیں۔ پہلی کارروائی علامہ اقبال انٹرنیشنل ایئرپورٹ پر کی گئی، جہاں جدہ جانے والے مسافر کے سامان میں موجود کپڑوں میں جذب شدہ 14.912 کلوگرام آئس برآمد کی گئی۔
دوسری کارروائی جناح انٹرنیشنل ایئرپورٹ کے کارگو شیڈ میں عمل میں آئی، جہاں فلپائن جانے والے ایک پارسل سے کپڑوں میں جذب شدہ 13.350 کلوگرام آئس برآمد کی گئی۔
مزید پڑھیں: اے این ایف کا تعلیمی اداروں اور مختلف شہروں میں منشیات اسمگلنگ کے خلاف بڑا کریک ڈاؤن
تیسری کارروائی ترنول ٹول پلازہ، راولپنڈی کے قریب کی گئی، جہاں ایک مسافر خاتون کے قبضے سے 4.800 کلوگرام چرس برآمد ہوئی۔
اے این ایف کے مطابق تمام کارروائیوں کے بعد انسداد منشیات ایکٹ 1997 کے تحت مقدمات درج کر کے مزید تحقیقات کا آغاز کر دیا گیا ہے۔
