اسلام آباد (عرفان حیدر) — اینٹی نارکوٹکس فورس (اے این ایف) نے تعلیمی اداروں کے اطراف اور ملک کے مختلف شہروں میں منشیات اسمگلنگ کے خلاف مؤثر کریک ڈاؤن کرتے ہوئے 4 کارروائیوں میں خاتون سمیت 7 ملزمان کو گرفتار کر لیا۔ کارروائیوں کے دوران مجموعی طور پر 17.8 کلوگرام منشیات برآمد کی گئی جس کی مالیت ایک کروڑ 23 لاکھ روپے سے زائد بتائی جا رہی ہے۔
تعلیمی اداروں کے قریب کارروائیاں
کاک پل اسلام آباد کے قریب اے این ایف نے کارروائی کرتے ہوئے دو ملزمان کے قبضے سے 2.4 کلوگرام چرس برآمد کر لی۔
فاروق اعظم کالونی اٹک میں یونیورسٹی کے نزدیک موٹر سائیکل سوار ملزم سے 400 گرام چرس برآمد ہوئی۔
گرفتار ملزمان نے اعتراف کیا کہ وہ تعلیمی اداروں کے طلباء کو منشیات فروخت کرتے تھے۔
مزید پڑھیں: راولپنڈی: کرکٹ میچ کی سیکیورٹی پر تعینات اہلکاروں کو مسلح شخص کی سنگین دھمکیاں، پولیس نے گرفتار کرلیا
دیگر کارروائیاں
علامہ اقبال ایئرپورٹ لاہور کے پارکنگ ایریا میں ایک گاڑی سے 12 کلوگرام ویڈ برآمد کیا گیا جبکہ دو ملزمان کو حراست میں لے لیا گیا۔
موٹر وے ٹول پلازہ اسلام آباد کے قریب اے این ایف نے کارروائی کرتے ہوئے ایک مسافر خاتون اور مرد سے 3 کلوگرام آئس ضبط کر لی۔
اے این ایف کے مطابق تمام کارروائیوں کے تحت انسدادِ منشیات ایکٹ 1997 کے تحت مقدمات درج کر کے تحقیقات کا آغاز کر دیا گیا ہے۔
