اسلام آباد (سعد عباسی) ترجمان اسلام آباد پولیس کے مطابق تھانہ کھنہ کے علاقے میں پولیس جوانوں نے بہادری کا مظاہرہ کرتے ہوئے مسلح راہزنوں کی واردات ناکام بنا دی۔ پولیس کی جانب سے جاری بیان میں کہا گیا ہے کہ دو ہنڈا 125 موٹر سائیکلوں پر سوار چھ مسلح ڈاکو واردات کی غرض سے جا رہے تھے کہ اسی دوران پولیس کی معمول کی چیکنگ ٹیم کو دیکھتے ہی ملزمان نے اندھا دھند فائرنگ شروع کر دی۔

فائرنگ کے نتیجے میں پولیس کے دو جوانوں کو سیدھی گولیاں لگیں تاہم حفاظتی اقدامات، بلٹ پروف جیکٹس اور ہیلمٹ کی وجہ سے دونوں اہلکار محفوظ رہے۔

پولیس کے مطابق فائرنگ کے دوران تین ڈاکو اپنے ہی ساتھیوں کی گولیوں سے زخمی ہو کر گرفتار کر لیے گئے، جبکہ ان کے قبضے سے اسلحہ بھی برآمد ہوا۔ دیگر مفرور ملزمان کی گرفتاری کے لیے علاقے میں سرچ آپریشن جاری ہے۔

پولیس ترجمان نے کہا کہ جوانوں نے اپنی جان کی پرواہ کیے بغیر ڈکیتوں کو ان کے مذموم مقاصد میں ناکام بنایا، جس سے شہریوں کو ایک بڑے ممکنہ نقصان سے بچا لیا گیا۔