اسلام آباد(روشن پاکستان نیوز) ٹک ٹاکر اور سوشل میڈیا انفلوئنسر ثنا یوسف کے قتل کیس میں اہم پیش رفت ہوئی ہے، عدالت نے گرفتار ملزم عمر حیات پر فردِ جرم عائد کر دی۔
تفصیلات کے مطابق اسلام آباد کی ڈسٹرکٹ اینڈ سیشن کورٹ میں ٹک ٹاکر ثنا یوسف قتل کیس کی سماعت ہوئی۔ کیس کی سماعت ایڈیشنل ڈسٹرکٹ اینڈ سیشن جج محمد افضل مجوکہ نے کی۔
عدالت میں ملزم عمر حیات کو پیش کیا گیا۔ جج نے ملزم سے استفسار کیا کہ “کیا آپ نے ثنا یوسف کو قتل کیا ہے؟” جس پر ملزم نے صحتِ جرم سے انکار کر دیا۔ عمر حیات نے مؤقف اختیار کیا کہ “میں نے ایسا کوئی جرم نہیں کیا، مجھ پر لگائے گئے تمام الزامات جھوٹے ہیں۔”
عدالت نے ملزم سے یہ بھی پوچھا کہ اس پر ثنا یوسف کا موبائل فون چھیننے کا بھی الزام ہے، جس پر عمر حیات نے تمام الزامات کو بے بنیاد قرار دیا۔
عدالت نے دلائل سننے کے بعد ملزم پر باقاعدہ فردِ جرم عائد کر دی اور کیس کی مزید سماعت 25 ستمبر تک ملتوی کر دی۔
یاد رہے کہ ملزم عمر حیات کے خلاف تھانہ سنبل میں قتل کا مقدمہ درج ہے، جس میں الزام عائد کیا گیا ہے کہ اس نے مبینہ طور پر ٹک ٹاکر ثنا یوسف کے گھر میں گھس کر فائرنگ کی اور اسے قتل کر دیا۔
