اسلام آباد(عرفان حیدر سے) اینٹی نارکوٹکس فورس (اے این ایف) پاکستان کی قومی سطح کی پریمئر کاؤنٹر نارکوٹکس ایجنسی ہے جو محدود وسائل اور محض 3000 اہلکاروں کے ساتھ اپنی ذمہ داریاں انتہائی محنت اور جانفشانی کے ساتھ سرانجام دے رہی ہے۔ اپنے عزم اور پیشہ ورانہ مہارت کے ذریعے اے این ایف ملک اور بیرونِ ملک منشیات پر قابو پانے میں اہم کردار ادا کر رہی ہے۔
اپریل 2025 میں ہونے والی کامیاب جی سی سی (GCC) کانفرنس کے بعد، اے این ایف نے خلیج تعاون کونسل کے رکن ممالک کے ساتھ تعاون کو مزید مضبوط بنایا۔ اس تعاون کا مقصد فضائی، زمینی اور سمندری راستوں کے ساتھ ساتھ بندرگاہوں پر بھی انسدادِ منشیات کی کارروائیوں کو بڑھانا ہے تاکہ بین الاقوامی ڈرگ ٹریفکنگ آرگنائزیشنز (DTOs) کے نیٹ ورکس کو توڑا جا سکے۔
ایک حالیہ بڑی کارروائی میں، اے این ایف نے ایک بین الاقوامی نیٹ ورک کو ختم کیا جو افغانستان، پاکستان اور قطر میں کام کر رہا تھا۔ یہ نیٹ ورک افغان سپلائرز سے منشیات حاصل کر کے چھوٹی مقدار میں پاک افغان سرحد سے پاکستان لاتا اور بعد میں انہیں فضائی و بحری راستوں سے خلیجی ممالک منتقل کرتا تھا۔ قطر میں یہ منشیات وصول کر کے دیگر جی سی سی ممالک میں آن لائن ٹریڈ نیٹ ورکس اور لاجسٹک چینلز کے ذریعے تقسیم کی جاتی تھیں۔ جن میں سی پورٹس کے ذریعے سامان منتقل کرنے والے ڈرائیور بھی شامل تھے۔
قانونی رکاوٹوں پر قابو پانے اور اسمگلرز کو بے نقاب کرنے کے لیے اے این ایف نے اپنی حکمتِ عملی سے نہ صرف اہم شواہد اکٹھے کیے بلکہ اسمگلنگ کے راستوں اور نیٹ ورکس کی نشاندہی بھی کی۔
ان کوششوں کے نتیجے میں اے این ایف نے 5 کلو گرام ہیروئن اور میتھ ایمفیٹامائن سے جذب شدہ کپڑا برآمد کر کے اس نیٹ ورک کے اہم ارکان کو گرفتار کر لیا۔
تحقیقات سے معلوم ہوا کہ یہ اسمگلرز منظم مافیائوں سے منسلک ہیں جو جدید اسمگلنگ کے طریقوں اور آن لائن پلیٹ فارمز کے ذریعے اپنا غیر قانونی کاروبار بڑھا رہے تھے۔ اس آپریشن نے خلیجی ممالک میں منشیات اسمگل کرنے کی مزید کوششوں کے خلاف ایک مضبوط رکاوٹ پیدا کی ہے۔
مزید پڑھیں: اے این ایف کا منشیات فروشوں کے خلاف بڑا کریک ڈاؤن، 239 کلوگرام منشیات برآمد، 8 ملزمان گرفتار
مزید ارکان کی گرفتاری اور ان کے اثاثوں کی نشاندہی کے لیے کارروائیاں اور تحقیقات جاری ہیں۔
ایسی سرگرمیاں اے این ایف کو اپنے مشن سے پیچھے نہیں دھکیلتی ہیں بلکہ اس کے عزم کو مزید مستحکم کرتی ہیں کہ وہ اندرون ملک اور بین الاقوامی تعاون کے ذریعے منشیات کے خاتمے کے لیے اپنی جدوجہد جاری رکھے۔ اے این ایف منشیات سمگلنگ کے ان نیٹ ورکس کو ختم کرنے اور ایک محفوظ، منشیات سے پاک معاشرہ تشکیل دینے کے لیے پرعزم ہے تاکہ پاکستان کی آنے والی نسلوں کو اس لعنت سے محفوظ رکھا جا سکے۔
