راولپنڈی (کرائم رپورٹر) راولپنڈی پولیس نے جرائم پیشہ عناصر کے خلاف بھرپور کارروائیاں کرتے ہوئے مختلف مقدمات میں ملوث ملزمان کو گرفتار کر لیا۔ پولیس کی یہ کارروائیاں ضلع بھر میں امن و امان کے قیام اور عوام کے جان و مال کے تحفظ کو یقینی بنانے کے لیے کی گئیں۔
قتل کے مقدمات میں پیشرفت:
واہ کینٹ پولیس نے فائرنگ کر کے شہری کو قتل کرنے والے دو ملزمان کو گرفتار کر لیا۔ پولیس کے مطابق دونوں افراد نے ذاتی رنجش پر شہری کو قتل کیا اور واردات کے بعد روپوش ہو گئے تھے۔ واہ کینٹ پولیس نے ہیومن انٹیلی جنس سمیت تمام ذرائع استعمال کرتے ہوئے ملزمان کو گرفتار کیا۔ ایس پی پوٹھوہار طلحہ ولی کے مطابق ملزمان کو ٹھوس شواہد کے ساتھ عدالت میں پیش کیا جائے گا۔
کلر سیداں پولیس نے بھی چھری کے وار سے شہری کو قتل کرنے والے ایک شخص کو گرفتار کیا۔ ملزم نے سابقہ رنجش پر ساتھیوں کے ہمراہ شہری کو قتل کیا تھا۔ ایس پی صدر محمد نبیل کھوکھر نے بتایا کہ دیگر مفرور ساتھیوں کی گرفتاری کے لیے بھی کوششیں جاری ہیں۔
محرم الحرام کے لیے سکیورٹی اقدامات:
سی پی او سید خالد ہمدانی کی ہدایت پر پولیس لائنز ہیڈکوارٹرز میں سکاوٹس (رضا کاروں) کے لیے تربیتی پروگرام کا تیسرا دن مکمل ہوا۔ اس دوران ڈی ایس پی ہیڈکوارٹرز، بم ڈسپوزل سکواڈ، سپیشل برانچ، ایلیٹ فورس اور ریسکیو ٹیموں نے سکاوٹس کو مجالس و جلوسوں کی سیکیورٹی، تلاشی کے طریقہ کار، ایمرجنسی کی صورتحال سے نمٹنے اور ابتدائی طبی امداد کی تربیت فراہم کی۔
مزید پڑھیں: راولپنڈی پولیس کی کامیاب کارروائیاں، مختلف نوعیت کے مقدمات میں مجرم گرفتار اور سزا
منشیات کے خلاف کریک ڈاؤن:
راولپنڈی پولیس نے منشیات فروشوں کے خلاف کارروائیاں کرتے ہوئے 3 افراد کو گرفتار کیا۔ روات پولیس نے 1 کلو 680 گرام، آر اے بازار پولیس نے 800 گرام جبکہ نصیرآباد پولیس نے 537 گرام چرس برآمد کی۔ پولیس حکام کے مطابق نوجوان نسل کو منشیات کے زہر سے بچانے کے لیے ایسی کارروائیاں جاری رہیں گی۔
شراب برآمدگی:
ضلع بھر میں کی گئی کارروائیوں میں 4 افراد کو گرفتار کر کے 20 لیٹر سے زائد شراب برآمد کی گئی۔ گوجر خان پولیس نے 10 لیٹر اور 2 بوتل، وارث خان پولیس نے 5 لیٹر جبکہ صدر واہ پولیس نے بھی 5 لیٹر شراب برآمد کی۔ ملزمان کے خلاف الگ الگ مقدمات درج کر لیے گئے۔
ناجائز اسلحہ کے خلاف اقدامات:
راولپنڈی پولیس نے مختلف علاقوں میں کارروائیاں کرتے ہوئے 7 افراد کو ناجائز اسلحہ رکھنے کے جرم میں گرفتار کیا۔ کارروائیاں تھانہ پیر ودھائی، بنی، نصیرآباد، چکلالہ، صدر واہ اور روات کے علاقوں میں کی گئیں۔ تمام زیر حراست افراد کے خلاف مقدمات درج کر لیے گئے ہیں۔
ترجمان راولپنڈی پولیس نے کہا ہے کہ شہر میں جرائم کے خاتمے کے لیے تمام دستیاب وسائل بروئے کار لائے جا رہے ہیں اور عوام کے تحفظ کو یقینی بنانے کے لیے پولیس پوری طرح متحرک ہے۔
