راولپنڈی(روشن پاکستان نیوز) — پاکستان سپر لیگ 2025 کے میچز کے دوران راولپنڈی پولیس نے فول پروف سیکورٹی انتظامات کا اعلان کیا ہے۔ راولپنڈی پولیس کے 5000 سے زائد افسران فرائض سرانجام دیں گے، جبکہ ٹریفک کی روانی کو برقرار رکھنے کے لیے ٹریفک پولیس کے 367 افسران بھی تعینات ہوں گے۔ سی سی ٹی وی مانیٹرنگ کے لیے خصوصی کنٹرول روم قائم کیا گیا ہے اور ایلیٹ فورس، ڈولفن فورس اور تھانوں کی موبائلز گشت کے فرائض سرانجام دیں گی۔ میچ دیکھنے کے لیے شائقین کرکٹ کو واک تھرو گیٹ اور مکمل باڈی سرچنگ کے بعد سٹیڈیم میں داخلے کی اجازت دی جائے گی۔ سی پی او سید خالد ہمدانی نے کہا کہ میچز کے دوران سیکورٹی انتظامات کے ساتھ ساتھ ٹریفک کی روانی کو بھی یقینی بنایا جائے گا۔
دوسری جانب، وارث خان پولیس نے شہر کے مختلف علاقوں میں منشیات سپلائی کرنے والے بڑے منشیات سپلائر ارشد عرف ٹلہ کو گرفتار کیا ہے، جس سے 11 کلو 200 گرام چرس برآمد ہوئی۔ ملزم ارشد سابقہ منشیات کے مقدمات میں ریکارڈ یافتہ اور سزایافتہ ہے۔ سی پی او سید خالد ہمدانی نے کہا کہ منشیات کے خاتمے کے لیے کریک ڈاؤن جاری رکھا جائے گا۔
اسی سلسلے میں، راولپنڈی پولیس نے منشیات سپلائرز کے خلاف ایک اور بڑی کارروائی کی جس میں 13 ملزمان کو گرفتار کیا گیا۔ ان میں ایک افغان باشندہ اور ایک خاتون ملزمہ بھی شامل ہیں۔ مجموعی طور پر 31 کلو سے زائد چرس برآمد ہوئی۔ سی پی او کا کہنا تھا کہ منشیات کے خلاف اقدامات وزیر اعلیٰ پنجاب کے ویژن کے مطابق جاری رکھے جائیں گے۔
راولپنڈی پولیس نے ایک اور بڑی کامیابی حاصل کرتے ہوئے ایک ماہ قبل قتل کے مقدمے میں ملوث مرکزی ملزم اکرام کو گرفتار کر لیا۔ ملزم نے سابقہ رنجش پر گلفراز کو فائرنگ کر کے قتل کیا تھا۔ ایس پی صدر محمد نبیل کھوکھر نے کہا کہ ملزم کو ٹھوس شواہد کے ساتھ چالان عدالت کیا جائے گا۔
وارث خان پولیس نے تین رکنی بائیک لفٹر گینگ کو گرفتار کر لیا اور ان کے قبضے سے 12 مسروقہ موٹر سائیکل برآمد کیے۔ ملزمان کو چالان عدالت کیا جائے گا۔ ایس پی راول محمد حسیب راجہ نے کہا کہ شہریوں کے قیمتی اثاثے چھیننے والوں کے خلاف سخت کارروائیاں جاری رہیں گی۔
مزید پڑھیں: راولپنڈی پولیس کی اہم کارروائیاں: مقدمات اور جرائم کے خلاف سخت اقدامات
راولپنڈی پولیس نے ناجائز اسلحہ رکھنے والے افراد کے خلاف بھی کارروائیاں کیں۔ سول لائنز پولیس نے ملزم سعید سے ایک پستول اور ایمونیشن، واہ کینٹ پولیس نے ملزم بلال سے ایک پستول اور ایمونیشن، اور مندرہ پولیس نے ملزم شان سے ایک کلاشنکوف اور ایمونیشن برآمد کیے۔ تمام ملزمان کے خلاف مقدمات درج کر لیے گئے ہیں۔
راولپنڈی پولیس کے تمام ایس پیز نے کہا ہے کہ ناجائز اسلحہ رکھنے والوں کے خلاف کارروائیاں مزید تیز کر دی جائیں گی تاکہ شہر کو پرامن بنایا جا سکے۔
