راولپنڈی(کرائم رپورٹر) راولپنڈی پولیس کی جانب سے مختلف جرائم پیشہ عناصر کے خلاف کارروائیاں جاری ہیں جس میں زمین کے تنازعہ پر فائرنگ کرنے والے مجرمان، ڈکیتی، موٹر سائیکل چوری، غیر قانونی گیس ری فلنگ اور پٹرول ایجنسیوں کے خلاف کارروائیاں شامل ہیں۔
زمین کے تنازعہ پر فائرنگ کرنے والے مجرمان کو سزا
راولپنڈی پولیس نے زمین کے تنازعہ پر فائرنگ کر کے 4 افراد کو زخمی کرنے والے تین مجرمان کو معزز عدالت سے سزا دلوائی۔ مجرمان محمد گلفراز، پرویز اور کامران عظمت کو مجموعی طور پر 39 سال قید، 6 لاکھ روپے جرمانہ اور 3 لاکھ روپے ضمانت کی سزا سنائی گئی۔ سی پی او سید خالد ہمدانی نے ایس ایس پی انوسٹی گیشن اور تفتیشی ٹیم کو شاباش دیتے ہوئے کہا کہ سنگین مقدمات میں مجرمان کو سزائیں ملنا حق و انصاف کی فتح ہے۔
ڈکیتی اور موٹر سائیکل چوری میں ملوث گینگ گرفتار
تھانہ بنی پولیس نے ڈکیتی اور موٹر سائیکل چوری میں ملوث تین رکنی گینگ کو گرفتار کر لیا۔ ملزمان ارسلان، افضل اور ندیم سے تین مسروقہ موٹر سائیکل، 9500 روپے کی مسروقہ رقم اور اسلحہ برآمد کیا گیا۔ ایس پی راول محمد حسیب راجہ نے کہا کہ ملزمان کو ٹھوس شواہد کے ساتھ عدالت میں پیش کر کے قرار واقعی سزا دلوائی جائے گی۔
سٹریٹ کرائم اور موٹر سائیکل چوری کی وارداتوں میں ملوث گینگ گرفتار
صدر بیرونی پولیس نے سٹریٹ کرائم اور موٹر سائیکل چوری کی وارداتوں میں ملوث دو رکنی گینگ کو گرفتار کیا۔ ملزمان شاہ زیب اور جمیل سے 9 چوری شدہ موٹر سائیکل اور اسلحہ برآمد کیا گیا۔ ایس پی صدر محمد نبیل کھوکھر نے کہا کہ ملزمان کو شواہد کے ساتھ عدالت میں پیش کیا جائے گا۔
غیر قانونی گیس ری فلنگ اور پٹرول ایجنسیوں کے خلاف کریک ڈاؤن
راولپنڈی پولیس نے پنجاب حکومت کے احکامات کے تحت غیر قانونی گیس ری فلنگ اور پٹرول ایجنسیوں کے خلاف کریک ڈاؤن جاری رکھا۔ 12 ملزمان کو گرفتار کیا گیا جن سے سلنڈر، موٹریں اور دیگر سامان برآمد ہوا۔ پولیس نے ان ایجنسیوں کو سیل کرنے کا عمل شروع کر دیا ہے۔
ٹیکسلا پولیس کی کارروائی، قتل کے مقدمے میں مطلوب ملزم گرفتار
ٹیکسلا پولیس نے بجلی کے پول کے تنازعہ پر دو بھائیوں کو قتل کرنے والے ملزم نصرت شاہ کو گرفتار کیا۔ ملزم نے فائرنگ کر کے توفیق اور توقیر کو قتل کر دیا تھا۔
پیرودھائی پولیس کی کارروائی، قتل کے مقدمے میں مطلوب ملزم گرفتار
پیرودھائی پولیس نے معمولی تلخ کلامی پر شہری عدنان خان کو قتل کرنے والے ملزم سیف اللہ کو گرفتار کیا۔ ملزم کو ٹھوس شواہد کے ساتھ چالان عدالت کر کے قرار واقعی سزا دلوائی جائے گی۔
منشیات فروشوں کے خلاف کریک ڈاؤن
سی پی او سید خالد ہمدانی کی ہدایت پر پوٹھوہار ڈویژن پولیس نے منشیات فروشوں کے خلاف کریک ڈاؤن جاری رکھا۔ صدر واہ پولیس، واہ کینٹ پولیس اور ٹیکسلا پولیس نے 4 ملزمان کو گرفتار کر کے 5 کلو سے زائد چرس برآمد کی۔
پرچی جواء کے ذریعے شہریوں کو لوٹنے والے ملزمان گرفتار
وارث خان پولیس نے انعام کے لالچ دے کر پرچی جواء کے ذریعے شہریوں کو لوٹنے والے ملزمان فیصل اور عادل کو گرفتار کیا۔ ملزمان سے چھینے گئے موبائل فونز اور رقم بھی برآمد کی گئی۔
مزید پڑھیں: آڈیو لیکس کیس میں وزیراعلیٰ خیبرپختونخوا کے ناقابل ضمانت وارنٹ گرفتاری برقرار
سرچ آپریشنز کا سلسلہ جاری
تھانہ سول لائنز پولیس نے لالکڑتی اور گردونواح میں سرچ آپریشن کیا جس میں 93 دوکانوں اور 2 ہوٹلوں سمیت 179 افراد کے کوائف چیک کیے گئے۔ ایس پی پوٹھوہار طلحہ ولی کا کہنا تھا کہ سرچ آپریشنز کا مقصد جرائم پیشہ عناصر کی بیخ کنی کرنا ہے۔
شراب سپلائرز کے خلاف کارروائیاں
راولپنڈی پولیس نے شراب سپلائرز کے خلاف کارروائیاں جاری رکھتے ہوئے 5 ملزمان کو گرفتار کر کے 65 لیٹر شراب برآمد کی۔ ایس پیز نے کہا کہ شراب سپلائرز کے خلاف کریک ڈاؤن جاری رکھا جائے گا تاکہ منشیات کے ناسور کا خاتمہ کیا جا سکے۔
