راولپنڈی: (روشن پاکستان نیوز) آئی جی پنجاب ڈاکٹر عثمان انور نے سیف سٹی راولپنڈی کا دورہ کیا، اس موقع پر آر پی او راولپنڈی بابر سرفراز الپا، سی پی او راولپنڈی سید خالد ہمدانی، ایس ایس پی آپریشنز، ایس ایس پی آئی سی تھری اور دیگر افسران بھی ہمراہ تھے۔
آئی جی پنجاب نے سیف سٹی کے کمانڈ اینڈ کنٹرول روم کا جائزہ لیا اور افسران کو ہدایات دیں۔ آر پی او اور سی پی او راولپنڈی نے سیف سٹی کی ورکنگ کے حوالے سے بریفنگ دی۔ ڈاکٹر عثمان انور نے افسران کو ہدایت دیتے ہوئے کہا کہ سیف سٹی پراجیکٹ کے سول ورک اور تزین و آرائش کا باقی کام جلد مکمل کیا جائے۔ انہوں نے کہا کہ کریمنلز تک رسائی اور موثر تفتیش کے لیے سیف سٹی کی آرٹیفیشل انٹیلی جنس بیسڈ سہولیات سے بھرپور استفادہ کیا جائے۔
آئی جی پنجاب نے کہا کہ سیف سٹی پراجیکٹ ٹریفک مینجمنٹ، انوائرنمنٹل پروٹیکشن سرویلنس اور تجاوزات کے تدارک میں بھی اہم کردار ادا کر رہا ہے۔ انہوں نے سیف سٹی پراجیکٹس کو کمیونٹی پولیسنگ میں بہترین مثال قرار دیا اور شہریوں کی مدد کے لیے ان کی لاجواب خدمات کو سراہا۔
آئی جی پنجاب نے جڑواں شہروں اسلام آباد اور راولپنڈی کے درمیان موثر کوآرڈینیشن کی اہمیت پر بھی زور دیا اور کہا کہ قانون نافذ کرنے والے اداروں کے ساتھ تعاون کو مزید بڑھایا جائے گا۔ ان کا کہنا تھا کہ سیف سٹی پراجیکٹس کا دائرہ پنجاب کے تمام اضلاع اور تحصیلوں تک بڑھایا جا رہا ہے۔
ویمن سیفٹی سکواڈ کی تعیناتی
وزیراعلیٰ پنجاب مریم نواز کے ویژن کے مطابق، راولپنڈی کے بازاروں میں ویمن سیفٹی سکواڈ تعینات کر دیا گیا ہے۔ سی پی او سید خالد ہمدانی کے مطابق، ویمن سیفٹی سکواڈ بینک روڈ اور کمرشل مارکیٹ میں اپنے فرائض سرانجام دے گا۔ سکواڈ کی لیڈی افسران سکوٹی اور سائیکل پر بازاروں میں گشت کریں گی تاکہ خواتین کو محفوظ ماحول فراہم کیا جا سکے۔
ویمن سیفٹی سکواڈ کا مقصد خواتین کو ہراسمنٹ اور دیگر جرائم سے تحفظ فراہم کرنا ہے۔ رمضان کے آخری ایام میں بازاروں میں رش کی پیش نظر یہ سکواڈ تعینات کیا گیا ہے تاکہ خواتین اپنے خریداری کے عمل کو پرامن انداز میں مکمل کر سکیں۔
گوجرخان میں دوہرے قتل کا واقعہ
گوجرخان کے علاقے میں دوہرے قتل کے واقعے پر سی پی او سید خالد ہمدانی نے نوٹس لیا اور ایس پی صدر کو ملزم کی فوری گرفتاری کا حکم دیا۔ ایس پی صدر محمد نبیل کھوکھر اور ایس ڈی پی او گوجرخان پولیس نفری کے ہمراہ موقع پر موجود ہیں۔ ابتدائی اطلاعات کے مطابق، فائرنگ کا واقعہ سابقہ رنجش کی بنا پر پیش آیا، جس میں ایک فریق کے افراد قتل جبکہ دوسرے فریق کے افراد زخمی ہوئے۔ پولیس نے تحقیقات کا آغاز کر دیا ہے۔
قماربازی کے خلاف کارروائی
آراے بازار پولیس نے تاش پر جوا کھیلنے والے 12 قماربازوں کو گرفتار کیا اور ان سے 15 ہزار 660 روپے کی رقم، 3 موبائل فون، تاش اور 2 موٹر سائیکل برآمد کیے۔ ایس پی پوٹھوہار طلحہ ولی نے قماربازی کے خلاف کارروائیاں جاری رکھنے کا عزم ظاہر کیا۔
منشیات فروشوں کے خلاف کارروائیاں
راولپنڈی پولیس نے منشیات فروشوں کے خلاف کارروائیاں جاری رکھتے ہوئے 2 ملزمان کو گرفتار کیا اور ان سے 2.5 کلو چرس برآمد کی۔ ملزمان کے خلاف الگ الگ مقدمات درج کر لیے گئے ہیں۔
مزید پڑھیں: آڈیو لیکس کیس میں وزیراعلیٰ خیبرپختونخوا کے ناقابل ضمانت وارنٹ گرفتاری برقرار
ناجائز اسلحہ رکھنے والوں کے خلاف کارروائیاں
راولپنڈی پولیس نے ناجائز اسلحہ رکھنے والوں کے خلاف کارروائی کرتے ہوئے 4 ملزمان کو گرفتار کیا اور ان سے پستول، ایمونیشن اور چھریاں برآمد کیں۔
ترجمان راولپنڈی پولیس کے مطابق، پولیس شہریوں کی جان و مال کی حفاظت اور امن و امان کے قیام کے لیے ہمہ وقت مصروف عمل ہے۔
