اسلام آباد (روشن پاکستان نیوز)پاکستان کی معروف ماہر نفسیات اور سوشل میڈیا ایکٹویسٹ، ڈاکٹر نبیہ علی خان نے سوشل میڈیا پر ایک ویڈیو پیغام جاری کرتے ہوئے کہا کہ ان کی جان کو خطرہ لاحق ہے۔ ڈاکٹر نبیہ علی خان نے ویڈیو میں تین افراد کے نام لیے ہیں جن کے بارے میں ان کا دعویٰ ہے کہ ان سے ان کی زندگی کو خطرہ ہے۔
ڈاکٹر نبیہ علی خان نے مزید کہا کہ ان پر قاتلانہ حملہ بھی ہو چکا ہے اور ان کے گھر پر بھی حملہ کیا گیا ہے۔ انہوں نے اپنے پیغام میں کہا کہ ان کے 15 سالہ صحافتی تجربے کی بنیاد پر، انہوں نے لاہور میں عزت سے زندگی گزاری ہے اور وہ یہ نہیں سمجھتیں کہ ان کا قصور کیا ہے کہ ان پر اس طرح کے حملے کیے گئے۔
ڈاکٹر نبیہ علی خان نے پاکستان بار کونسل، پنجاب بار کونسل، اعظم نذیر تارڑ گروپ، احسن بھون گروپ، قانون نافذ کرنے والے اداروں، آئی جی پنجاب اور وزیراعلیٰ پنجاب مریم نواز سے اپیل کی کہ ان کی حفاظت کو یقینی بنایا جائے۔
انہوں نے خاص طور پر وکیل عمران قریشی کا نام لیا، جنہیں ان کا دعویٰ ہے کہ وہ ان کی جان کے دشمن بن چکے ہیں۔ ڈاکٹر نبیہ علی خان کی جانب سے اس پیغام کے بعد سوشل میڈیا پر ان کے حامیوں نے ان کی حمایت کا اظہار کیا اور حکومت سے فوری طور پر ان کی حفاظت کے لیے اقدامات کرنے کی درخواست کی ہے۔
مزید پڑھیں: سوشل میڈیا پر خواتین کی عزت کو خطرہ: ٹک ٹاک اور دیگر پلیٹ فارمز کے ذریعے اسلامی معاشرتی اقدار پر حملہ
یہ واقعہ ایک مرتبہ پھر پاکستان میں خواتین کی حفاظت اور ان کے حقوق کے حوالے سے گفتگو کا آغاز کر رہا ہے، اور قانونی اداروں سے تیزی سے ردعمل کی ضرورت کا احساس دلا رہا ہے۔
