راولپنڈی(عرفان حیدر) ہارٹیکلچر ایجنسی راولپنڈی کی جانب سے ایم ڈی ہارٹیکلچر ایجنسی احمد حسن رانجھا کی ہدایات پر شہر بھر کے پارکس کی خوبصورتی میں اضافے اور پھولوں و پودوں کی نگہداشت کے اقدامات جاری ہیں۔ ان اقدامات کا مقصد شہریوں کو بہتر، محفوظ اور صحت مند تفریحی سہولیات فراہم کرنا ہے۔
اسی سلسلے میں راولپنڈی کے معروف اور خوبصورت علامہ اقبال پارک کی سجاوٹ اور آرائش کے خصوصی انتظامات کیے گئے ہیں۔ پارک میں لگے پھولوں اور پودوں کو شدید سردی کے مضر اثرات سے بچانے کے لیے بھی مؤثر اقدامات کیے گئے ہیں۔ علامہ اقبال پارک میں رنگ برنگے پھول اور سرسبز پودے بہار کا سماں پیش کر رہے ہیں، جس سے پارک کی فضا مزید دلکش اور خوشگوار ہو گئی ہے۔
خوبصورتی سے سجی ہوئی فضا شہریوں کی توجہ کا مرکز بن چکی ہے، جہاں بڑی تعداد میں فیملیز آ کر بہترین تفریحی سہولیات سے لطف اندوز ہو رہی ہیں۔ ہارٹیکلچر ایجنسی راولپنڈی کا عملہ پوری محنت، لگن اور ذمہ داری کے ساتھ باغبانی کے امور انجام دے رہا ہے۔
ایم ڈی ہارٹیکلچر ایجنسی احمد حسن رانجھا کا کہنا ہے کہ راولپنڈی کے شہریوں کو بہترین تفریحی سہولیات فراہم کرنے کے لیے کوئی کسر اٹھا نہیں رکھی جائے گی۔ انہوں نے کہا کہ شہریوں کو صحت مند اور خوشگوار تفریحی ماحول فراہم کرنے کے لیے دن رات محنت جاری ہے، جبکہ شدید سرد موسم میں پارکس اور گرین بیلٹس میں لگے پودوں اور پھولوں کو محفوظ رکھنے کے لیے عملہ مسلسل متحرک ہے۔
