راولپنڈی(عرفان حیدر) ہارٹیکلچر ایجنسی راولپنڈی کی جانب سے ایم ڈی ہارٹیکلچر ایجنسی کی ہدایات پر عمل کرتے ہوئے شہر بھر کے پارکس کو خوبصورت بنانے اور سردیوں کے موسم کے مطابق پھولوں اور پودوں کی نگہداشت کے اقدامات جاری ہیں۔ شہریوں کو بہتر تفریحی اور حفاظتی سہولیات فراہم کرنے کے لیے تمام دستیاب وسائل بروئے کار لائے جا رہے ہیں۔
اس سلسلے میں ڈائریکٹر ہارٹیکلچر احمد حسن رانجھا کی ہدایت پر ملیہ پارک راولپنڈی کی سجاوٹ اور پودوں کو سردی کے مضر اثرات سے بچانے کا کام مکمل کر لیا گیا ہے۔ پارک میں لگے رنگ برنگے پھول اور سرسبز پودے بہار کا سماں پیش کر رہے ہیں، جس کی وجہ سے خوبصورتی سے سجی فضا شہریوں کی خصوصی توجہ کا مرکز بن گئی ہے۔ فیملیز بڑی تعداد میں پارک کا رخ کر رہی ہیں اور فراہم کردہ بہترین تفریحی سہولیات سے لطف اندوز ہو رہی ہیں۔
دوسری جانب ہارٹیکلچر ایجنسی راولپنڈی کا عملہ پوری محنت اور ذمہ داری کے ساتھ باغبانی کے امور سرانجام دے رہا ہے اور پودوں کی نگہداشت میں مصروف عمل ہے۔
احمد حسن رانجھا کا کہنا ہے کہ عوامی سہولت اور تفریح کے لیے تمام ضروری اقدامات کیے جا رہے ہیں۔ انہوں نے مزید کہا کہ پنجاب حکومت کے وژن کے مطابق راولپنڈی کو سرسبز و خوبصورت بنانے اور شہریوں کو صحت مند تفریحی ماحول فراہم کرنے کے لیے دن رات محنت جاری ہے۔ ان کا کہنا تھا کہ شدید سردی کے پیش نظر گرین بیلٹس اور پارکوں میں لگے پودوں اور پھولوں کو مضر اثرات سے بچانے کے لیے ہارٹیکلچر ایجنسی کا عملہ متحرک ہے، جبکہ شہر بھر میں شجرکاری مہم بھی بھرپور انداز میں جاری ہے جس سے ماحولیاتی آلودگی اور سموگ میں کمی لانے میں مدد ملے گی۔
