اسلام آباد (روشن پاکستان نیوز) سول سروسز اکیڈمی لاہور کے ڈائریکٹر ٹریننگ ڈاکٹر شبیر زیدی نے گزشتہ روز ہیلتھ سروسز اکیڈمی اسلام آباد کا دورہ کیا، جہاں انہوں نے وائس چانسلر ڈاکٹر شہزاد علی خان سے ملاقات کی۔ ملاقات میں دونوں اداروں کے درمیان باہمی تعاون کو فروغ دینے اور سرکاری افسران کے لیے مشترکہ تربیتی پروگراموں کے آغاز پر تفصیلی گفتگو ہوئی ڈاکٹر شہزاد علی خان نے ہیلتھ سروسز اکیڈمی کے جاری تعلیمی اور تربیتی منصوبوں پر روشنی ڈالی اور اس بات پر زور دیا کہ صحت اور تعلیم کے شعبوں میں مؤثر قیادت کے لیے جدید تربیت ناگزیر ہے۔ اس موقع پر ڈاکٹر شبیر زیدی نے سول سروسز اکیڈمی کی جانب سے لیڈرشپ، مینجمنٹ اور پبلک پالیسی سے متعلق تربیتی پروگراموں کے تجربات شیئر کیے اور کہا کہ دونوں ادارے مل کر سرکاری افسران کی استعداد کار بڑھانے میں اہم کردار ادا کرسکتے ہیںدونوں رہنماؤں نے اس بات پر اتفاق کیا کہ مستقبل قریب میں صحت اور تعلیم کے شعبوں کے سینئر افسران کے لیے مشترکہ لیڈرشپ اور مینجمنٹ کورسز کا آغاز کیا جائے گا، تاکہ پالیسی سازی اور انتظامی امور میں کارکردگی کو مزید بہتر بنایا جا سکے۔