راولپنڈی(عرفان حیدر) پارکس اینڈ ہارٹیکلچر اتھارٹی (پی ایچ اے) راولپنڈی شہر بھر کے پارکس، گرین بیلٹس اور اہم شاہراہوں کی سجاوٹ اور خوبصورتی کے لئے بھرپور اقدامات کر رہی ہے۔ ڈی جی پی ایچ اے احمد حسن رانجھا کی خصوصی ہدایات کے تحت شہر کے تمام پارکس اور چوراہوں کی تزئین و آرائش اور نگہداشت کا کام جاری ہے۔
پی ایچ اے کی مختلف نرسریوں میں رنگ برنگے پھولوں اور پودوں کی روزانہ کی بنیاد پر دیکھ بھال کی جا رہی ہے، جس سے راولپنڈی شہر کا ماحول نہایت خوشگوار اور سرسبز ہو گیا ہے۔ شہریوں کے لئے تفریحی مقامات کو محفوظ بنانے کے لئے پارکس میں بہترین سیکیورٹی انتظامات بھی کیے گئے ہیں تاکہ لوگ بلا خوف و خطر اپنے اہل خانہ کے ساتھ یہاں وقت گزار سکیں۔
ڈی جی پی ایچ اے احمد حسن رانجھا نے کہا کہ راولپنڈی کو خوبصورت اور سرسبز بنانے کے لئے شجرکاری مہم بھی زور و شور سے جاری ہے جس کا مقصد ماحولیاتی آلودگی کو کم کرنا اور شہریوں کو ایک خوشگوار ماحول فراہم کرنا ہے۔ انہوں نے یقین دہانی کرائی کہ عوام کی سہولت اور تفریح کے لئے تمام ضروری اقدامات اٹھائے جا رہے ہیں اور اس حوالے سے کسی قسم کی کوتاہی برداشت نہیں کی جائے گی۔
مزید پڑھیں: سیکرٹری ہاؤسنگ کیپٹن (ر) نورالامین کی راولپنڈی کو خوبصورت بنانے کے لیے پی ایچ اے کے اقدامات کی تعریف
پی ایچ اے راولپنڈی شہر کو پنجاب حکومت کے وژن کے مطابق بہترین تفریحی سہولیات فراہم کرنے کے لئے کوشاں ہے اور شہریوں کی جانب سے اس کوشش کو خوب سراہا جا رہا ہے۔
