اسلام آباد (روشن پاکستان نیوز) اساس انٹرنیشنل اسکول ایف-10 برانچ اسلام آباد میں ایک پروقار اور روح پرور محفلِ نعت کا انعقاد کیا گیا، جس میں گریڈ 8 تک کے طلبہ و طالبات نے شرکت کی۔ اس موقع پر ننھے بچوں نے نبی کریم حضرت محمد مصطفیٰ ﷺ کی بارگاہِ اقدس میں عقیدت و محبت کے نذرانے پیش کیے۔
محفل کا آغاز تلاوتِ قرآنِ پاک سے ہوا، جس کے بعد بچوں نے خوبصورت اور دل کو چھو لینے والے انداز میں نعتیہ کلام پیش کیے۔ ان کے معصومانہ انداز، دلنشین آواز اور پرخلوص جذبے نے محفل کو ایک روحانی کیفیت بخش دی۔ حاضرین درود و سلام کی خوشبو سے معطر ہو گئے اور ہر طرف عشقِ رسول ﷺ کی روشنی پھیل گئی۔
تقریب میں اسکول کی برانچ ہیڈ محترمہ صفیہ جواد اور ہیڈ مسٹریس محترمہ سمیعہ فیصل نے خصوصی شرکت کی، جبکہ اساتذہ، والدین اور دیگر مہمانانِ گرامی بھی بڑی تعداد میں شریک ہوئے۔ طلبہ کی محنت، لگن اور پیشکش کو خوب سراہا گیا اور ان کے جذبے کی بھرپور تحسین کی گئی۔
محفل کے اختتام پر ملک و ملت کی ترقی، خوشحالی، امن و امان اور طلبہ کے روشن مستقبل کے لیے خصوصی دعا کی گئی۔ مقررین نے اس موقع پر اپنے خیالات کا اظہار کرتے ہوئے کہا کہ اس طرح کی تقریبات نہ صرف بچوں میں عشقِ رسول ﷺ کو فروغ دیتی ہیں بلکہ ان کی شخصیت سازی اور کردار سازی میں بھی کلیدی کردار ادا کرتی ہیں۔
شرکاء نے اس امر پر زور دیا کہ تعلیمی اداروں میں اس قسم کی روحانی تقریبات کا سلسلہ باقاعدگی سے جاری رہنا چاہیے تاکہ نئی نسل کو دینی و اخلاقی اقدار سے روشناس کرایا جا سکے اور وہ عشقِ رسول ﷺ سے سرشار ہو کر ایک مثبت اور تعمیری معاشرے کی تشکیل میں اپنا کردار ادا کر سکیں۔
