اسلام آباد(روشن پاکستان نیوز) وفاقی وزیر برائے قومی ورثہ و ثقافت اورنگزیب خان کھچی سے پرنٹ اینڈ الیکٹرانک جرنلسٹس ایسوسی ایشن (پیجا) کی نومنتخب باڈی نے چیئرمین ناصر خان خٹک کی قیادت میں ملاقات کی۔ وفاقی وزیر نے نومنتخب عہدیداران کو مبارکباد دی اور ان کے لیے نیک تمناؤں کا اظہار کیا۔
ملاقات کے دوران وفاقی وزیر نے قومی ورثہ و ثقافت کے فروغ میں میڈیا کے کردار کو سراہتے ہوئے کہا کہ صحافی ملکی ثقافت، روایات اور زبانوں کو اجاگر کرنے میں اہم کردار ادا کر رہے ہیں۔ انہوں نے کہا کہ وزارت قومی ورثہ و ثقافت ملک بھر میں علاقائی زبانوں میں کانفرنسز منعقد کرنے جا رہی ہے جن میں کشمیر، گلگت بلتستان، کوئٹہ، کراچی، ہزارہ، پشاور، لاہور اور ملتان شامل ہوں گے۔
وفاقی وزیر نے اعلان کیا کہ پاکستان اکیڈمی آف لیٹرز کے قیام کو 50 سال مکمل ہونے پر ایک عالمی ادبی کانفرنس کا انعقاد کیا جائے گا، جب کہ پاکستان نیشنل کونسل آف دی آرٹس (پی این سی اے) میں عالمی خطاطی مقابلے بھی منعقد کیے جائیں گے۔ یومِ آزادی کے موقع پر تمام ذیلی اداروں میں خصوصی تقریبات، نمائشیں اور ثقافتی سرگرمیاں بھی ترتیب دی جا رہی ہیں۔
انہوں نے بتایا کہ لوک ورثہ میں میو برادری کے ثقافتی ورثے کو اجاگر کرنے کے لیے خصوصی پویلین قائم کر دیا گیا ہے اور مستقبل میں دیگر برادریوں کے ثقافتی رنگ بھی پیش کیے جائیں گے۔ ٹیلنٹ کی تلاش کے لیے موسیقی، ادب، خطاطی اور دیگر فنون میں مہارت رکھنے والے نوجوانوں کی حوصلہ افزائی کے لیے پال، پی این سی اے اور دیگر اداروں کے اشتراک سے مختلف پروگرامز کا آغاز کیا جا رہا ہے۔
وفاقی وزیر نے مزید بتایا کہ لوک ورثہ اسلام آباد میں ایک معیاری ریسٹورنٹ کے قیام کے لیے ٹینڈر جاری کیا گیا ہے تاکہ ملکی و غیر ملکی سیاحوں کو بہتر سہولیات میسر ہوں۔ علاوہ ازیں، وزارت کی ملکیتی زمین پر دریائے سواں کے کنارے ایک بین الاقوامی ہوٹل چین کے قیام پر بھی کام جاری ہے، جہاں ایک تاریخی قلعہ بھی موجود ہے۔ اس منصوبے سے نہ صرف سیاحت کو فروغ ملے گا بلکہ ثقافتی ورثے کی ترویج اور حکومتی آمدن میں بھی اضافہ ہو گا۔
ملاقات کے اختتام پر دونوں جانب سے قومی ثقافت کے فروغ اور باہمی تعاون کے عزم کا اظہار کیا گیا۔
ملاقات میں چیئرمین پیجا ناصر خان خٹک کے ہمراہ جنرل سیکرٹری راجہ طاہر محمود، نائب صدور ضمیر حسین ضمیر، خالد حسین شاہ، جوائنٹ سیکرٹریز مشتاق احمد ملک، چوہدری گلزار ناز، راحیلہ راجہ، انفارمیشن سیکرٹری قاسم جمشید، ڈپٹی انفارمیشن سیکرٹری ثاقب قریشی اور گورننگ باڈی کے ممبران محمد ارشد، رانا شہزاد نعیم، محمد جمیل قریشی اور ملک شاہ زمان بھی شریک تھے۔
