اسلام آباد (روشن پاکستان نیوز) — پرنٹ اینڈ الیکٹرانک جرنلسٹس ایسوسی ایشن کی نئی کابینہ کی حلف برداری کی شاندار تقریب نیشنل پریس کلب اسلام آباد میں منعقد ہوئی۔ تقریب میں صحافتی برادری، پارلیمنٹ کے اراکین اور سینئر صحافیوں کی بڑی تعداد نے شرکت کی، جس نے اس موقع کو ایک تاریخی دن بنا دیا۔
تقریب کے مہمانانِ خصوصی وفاقی وزیر و چیئرمین پارلیمانی کمیٹی برائے کشمیر رانا محمد قاسم نون اور چیئرمین ڈیفنس کمیٹی و ممبر قومی اسمبلی سردار فتح اللہ میاں خیل تھے۔ دونوں معزز مہمانوں نے نومنتخب عہدیداران کو مبارکباد دی اور ان کی کامیابی کو صحافت کے لیے نیک شگون قرار دیا۔
اس موقع پر چیئرمین ناصر خان خٹک کو کامیاب الیکشن اور پُروقار تقریب کے انعقاد پر خصوصی طور پر سراہا گیا۔ انہوں نے صحافیوں کی فلاح و بہبود، آزادی اظہار اور صحافت کے تحفظ کے لیے اپنی کوششیں جاری رکھنے کا عزم دہرایا۔
تقریب میں سینئر صحافیوں بلال ڈار، چوہدری جاوید بھاگٹ (جوائنٹ سیکریٹری نیشنل پریس کلب)، سحر اسلم (نائب صدر)، نیئر علی (فنانس سیکریٹری)، آسیہ کوثر (ممبر گورننگ باڈی)، بشیر عثمانی (نائب صدر آر آئی یو جے)، خضر زمان ملک، راجہ ندیم اقبال، مدثر لانگ اور دیگر نے شرکت کی اور تنظیم پر اپنے بھرپور اعتماد کا اظہار کیا۔
مزید پڑھیں: میاں چنوں: پاکستان میڈیا کونسل کی تقریب حلف برداری، مرکزی صدر مہر حمید انور دلو کی شرکت
نومنتخب عہدیداران جنہوں نے اپنے عہدے کا حلف اٹھایا ان میں صدر ساجد خان، جنرل سیکرٹری راجہ طاہر محمود، فنانس سیکریٹری روبینہ شاہین، ایڈیشنل سیکریٹری نوید قریشی، نائب صدور محمد نعمان قدوس، ضمیر حسین ضمیر، خالد حسین شاہ، سعد عباسی، جوائنٹ سیکریٹریز مشتاق احمد ملک، چوہدری گلزار ناز، راحیلہ راجہ، سید ساجد نقوی، انفارمیشن سیکریٹری قاسم جمشید، ڈپٹی انفارمیشن سیکریٹری ثاقب قریشی اور ممبران گورننگ باڈی شامل تھے۔
اس تقریب میں تنظیم کی ترقی، آزادی صحافت کے فروغ اور صحافیوں کے حقوق کے تحفظ کے عزم کا اعادہ کیا گیا۔ شرکاء نے اس تقریب کو ایک مثبت قدم قرار دیتے ہوئے اُمید ظاہر کی کہ یہ نئی قیادت صحافی برادری کے مسائل کے حل اور ان کی فلاح و بہبود کے لیے عملی اقدامات کرے گی۔
اختتام پر خصوصی دعا کی گئی اور پرامن صحافت، اظہار رائے کی آزادی اور صحافیوں کے اتحاد کے لیے اجتماعی عزم کا اظہار کیا گیا۔
