راولپنڈی(روشن پاکستان نیوز) ڈسٹرکٹ پرائس کنٹرول کمیٹی راولپنڈی کا اجلاس قائم مقام چیئرمین خواجہ شہزاد اور ایڈیشنل ڈپٹی کمشنر جنرل ڈاکٹر حسان طارق کی زیر صدارت منعقد ہوا۔ اجلاس میں شہر میں چینی کے حالیہ بحران اور مہنگائی پر قابو پانے کے لیے اہم فیصلے کیے گئے۔
اجلاس میں فیصلہ کیا گیا کہ چینی کی فروخت کو حکومتی نرخوں پر یقینی بنانے کے لیے ہول سیلرز کی سخت نگرانی کی جائے گی اور ایک شفاف تقسیم کا نظام نافذ کیا جائے گا تاکہ ذخیرہ اندوزی اور مصنوعی قلت پر قابو پایا جا سکے۔
مہنگائی کے اثرات کم کرنے کے لیے دالوں، چاول اور دیگر اشیائے خورونوش کی نئی قیمتیں مقرر کی گئیں تاکہ مارکیٹ میں قیمتوں میں کمی کا براہِ راست فائدہ عوام کو پہنچ سکے۔
اجلاس میں سول سوسائٹی کے نئے اراکین — عابد عباسی، مون مغل، چوہدری فاروق، راجہ یاسر، جمیل قریشی، شیخ ارشد، شاہد غفور پراچہ، سلیم پرویز بٹ، رضوان عباسی، احسن عباسی سمیت نان بائی، میٹ ایسوسی ایشن اور ملک ایسوسی ایشن کے نمائندوں نے شرکت کی۔
سول سوسائٹی کے نمائندے عابد عباسی نے ڈی سی کاؤنٹرز کے قیام اور معیاری اشیائے خورونوش کی فراہمی و نمائش کو یقینی بنانے پر زور دیا۔ انہوں نے پرائس کنٹرول کمیٹی کے ماہانہ اجلاس کو باقاعدگی سے منعقد کرنے کی بھی سفارش کی۔
کریانہ اسٹورز پر چینی کی فراہمی کے مطالبے پر کریانہ اسٹور ایسوسی ایشن کے نمائندے سلیم پرویز بٹ کی درخواست پر ایک ذیلی کمیٹی قائم کر دی گئی ہے، جو لائسنس یافتہ ہولڈرز اور اسٹورز کو چینی کی شفاف اور منصفانہ فراہمی کی نگرانی کرے گی۔
اجلاس میں تمام شرکاء نے مہنگائی پر قابو پانے کے لیے کیے گئے اقدامات کی حمایت کی اور عوامی ریلیف کو اولین ترجیح قرار دیا۔
