کوئٹہ (روشن پاکستان نیوز): ورلڈ پیس جرگہ پروگرام کے چیئرمین رعایت اللہ خان المعروف خان بابا نے پاکستان بھر میں “خواتین امن جرگہ پروگرام” کے باضابطہ قیام کا اعلان کر دیا ہے۔ اس پروگرام کی قیادت سعدیہ خان (خان بی بی) کریں گی، جنہیں ملک بھر میں خواتین امن جرگہ پروگرام کی چیئرپرسن مقرر کیا گیا ہے۔ اس تاریخی اقدام کا مقصد خواتین کو بااختیار بنانا، معاشرتی ہم آہنگی کو فروغ دینا اور قومی ترقی میں خواتین کی مؤثر شرکت کو یقینی بنانا ہے۔
یہ اعلان 27 جولائی 2025 کو فیڈرل لاؤنج 1، زرغون روڈ، کوئٹہ میں منعقد ہونے والے ایک قومی سیمینار کے دوران کیا گیا۔ تقریب میں بلوچستان بھر سے تعلق رکھنے والی کاروباری، سماجی، فلاحی، اور مختلف شعبہ ہائے زندگی سے وابستہ خواتین کی بڑی تعداد نے شرکت کی۔ مقررین نے اس اقدام کو سراہتے ہوئے اسے وقت کی اہم ترین ضرورت قرار دیا اور کہا کہ یہ پروگرام پاکستان میں امن، ترقی اور شمولیتی قیادت کے فروغ میں کلیدی کردار ادا کرے گا۔
ورلڈ پیس جرگہ پروگرام پہلے ہی پاکستان کے تمام صوبوں، بشمول خیبرپختونخوا، بلوچستان، سندھ، پنجاب، آزاد جموں و کشمیر، اور گلگت بلتستان میں جرگہ نظام اور کمیٹیاں قائم کر چکا ہے۔ اب خواتین امن جرگہ پروگرام کو ملک گیر سطح پر منظم انداز میں وسعت دی جا رہی ہے۔
اگست 2025 کے آخر میں نیشنل لائبریری اسلام آباد (وزیراعظم ہاؤس کے قریب) میں صوبائی ممبران کی حلف برداری اور ایک عظیم قومی سیمینار کا انعقاد کیا جائے گا، جس میں وفاقی وزارتوں، غیر ملکی سفارت خانوں، سول سوسائٹی، اور حکومتی اداروں کے نمائندگان شرکت کریں گے۔
ورلڈ پیس جرگہ پروگرام نے حکومت پاکستان، خاص طور پر چیف سیکریٹریز، ہوم سیکریٹریز، کمشنرز، ڈپٹی کمشنرز، آئی جی صاحبان، ڈی آئی جی، ایس ایس پی حضرات اور وزیراعلیٰ بلوچستان کے تعاون پر ان کا تہہ دل سے شکریہ ادا کیا ہے۔
خواتین کی قیادت کا نیا باب
خصوصاً بلوچستان جیسے پسماندہ علاقوں میں خواتین کو قیادت اور ترقی کے مواقع سے طویل عرصے تک محروم رکھا گیا، مگر “خواتین امن جرگہ پروگرام” ان روایتی بیانیوں کو تبدیل کرنے کے لیے پرعزم ہے۔ اس پروگرام کے ذریعے خواتین کو تحفظ، مالی خودمختاری، ترقیاتی فنڈز تک رسائی اور ایک باوقار پلیٹ فارم فراہم کیا جائے گا، جہاں وہ اپنے مسائل کا حل خود تجویز کر سکیں گی۔
ورلڈ پیس جرگہ پروگرام جلد ہی اسلام آباد، ایران، دبئی، ریاض، قطر، برطانیہ، اور امریکہ میں بین الاقوامی ڈونر کانفرنسز کا انعقاد کرے گا، جن کا مقصد بین الاقوامی سرمایہ کاروں اور عطیہ دہندگان کو خواتین کی ترقی اور بلوچستان جیسے پسماندہ علاقوں میں ترقیاتی منصوبوں کی جانب راغب کرنا ہے۔
چیئرمین رعایت اللہ خان (خان بابا) اور چیئرپرسن سعدیہ خان (خان بی بی) نے وزیراعظم پاکستان، صدر پاکستان، چیف آف آرمی اسٹاف، وزرائے اعلیٰ، چیف سیکریٹریز، کور کمانڈرز، وفاقی وزارتوں اور ضلعی انتظامیہ سے اپیل کی ہے کہ اس قومی فلاحی پروگرام کو مکمل لاجسٹک معاونت، سیکیورٹی اور خصوصی ترقیاتی فنڈز فراہم کیے جائیں۔
پروگرام کا مقصد ہے کہ پاکستان کو ایک پرامن، بااختیار اور جامع ریاست میں تبدیل کیا جائے جہاں خواتین نہ صرف قیادت کریں بلکہ تبدیلی کی علمبردار بن کر نئی راہیں ہموار کریں۔
