کراچی(روشن پاکستان نیوز) عالمی امن جرگہ (WPJP) کے چیئرمین رعایت اللہ خان (خان بابا) کی قیادت میں اور ڈاکٹر نگز یاسمین خان کی زیر قیادت دی ویمنز کیئر فاؤنڈیشن آف پاکستان انٹرنیشنل ویلفیئر ٹرسٹ (TWCFT) کے تعاون سے ایک اہم فلاحی تقریب کا انعقاد کیا گیا، جس میں میڈیا پروفیشنلز اور خواجہ سرا کمیونٹی کے افراد میں راشن تقسیم کیا گیا۔
اس تقریب کا مقصد محروم طبقات کی فلاح و بہبود اور ان کے معاشرتی تعاون کو سراہنا تھا۔ چیئرمین خان بابا نے اپنے خطاب میں شمولیت، وقار اور مساوات کی ضرورت پر زور دیتے ہوئے کہا کہ “ہمیں یقین ہے کہ ہر فرد عزت، دیکھ بھال اور مساوی مواقع کا حق رکھتا ہے۔” انہوں نے مزید کہا کہ اس اقدام کے ذریعے عالمی امن جرگہ اور TWCFT کا مقصد خواجہ سرا کمیونٹی اور میڈیا پروفیشنلز کے لیے سیکیورٹی نیٹ فراہم کرنا ہے تاکہ ان کی معاشرتی خدمات کو تسلیم کیا جا سکے۔
یہ تقریب میڈیا انڈسٹری کی نمایاں شخصیات، خواجہ سرا کمیونٹی کے رہنماؤں اور مقامی معززین کی موجودگی میں منعقد ہوئی۔ عالمی امن جرگہ کی کنٹری ہیڈ، سعدیہ خان (خان بی بی) نے خواجہ سرا افراد کو مرکزی دھارے میں شامل کرنے کی اہمیت پر زور دیا اور سماجی ترقی میں ان کے مثبت کردار کو سراہا۔
چیئرمین خان بابا نے عالمی امن جرگہ کے وسیع تر ویژن کو بھی اجاگر کیا، جس میں جرگہ سسٹم کے ذریعے سرمایہ کاروں کو راغب کرنا، بزنس پروموشن، امن کے قیام، اور بیرون ملک مقیم پاکستانیوں کے مسائل کے حل پر مبنی بین الاقوامی سیمینارز کا انعقاد شامل ہے۔ پہلا سیمینار عید کے بعد کراچی میں منعقد کیا جائے گا، جس کے بعد سعودی عرب، دبئی اور برطانیہ میں بھی اسی نوعیت کے ایونٹس کا انعقاد کیا جائے گا۔
مزید پڑھیں: پنجاب حکومت کا رمضان بازار یا راشن پیکج کی بجائے نقد رقم دینے کا فیصلہ
تقریب میں عالمی امن جرگہ کے متعدد اہم ممبران بھی موجود تھے جن میں ڈاکٹر نگہت یاسمین خان (وائس پریذیڈنٹ، عالمی امن جرگہ سندھ)، شیراز احمد (کوآرڈینیٹر بزنس)، صبیحہ مشتاق (انفارمیشن سیکریٹری)، اور سردار محمد اخلاق (کوآرڈینیٹر) شامل تھے۔
عالمی امن جرگہ پاکستان میں امن، استحکام اور خوشحالی کے فروغ کے لیے حکومت اور مسلح افواج کے ساتھ مل کر کام کر رہا ہے۔
