حافظ آباد(شوکت علی وٹو)ڈسٹرکٹ الیکشن کمشنر خالد رشید اور الیکشن آفیسر عارفہ اصغر نے کہا ہے کہ انتخابات اور ملک میں جمہوری عمل کو مستحکم بنانے کے لیے نوجوانوں کا کردار بڑی اہمیت کا حامل ہے۔نوجوان اپنے ووٹ کے درست استعمال سے ملک میں آزاد،شفاف اور منصفانہ انتخابات کے ذریعے حکومتوں کے قیام میں عملی طور پر حصہ لیکر ملک و قوم کی ترقی اور خوشحالی کے لیے اپنا کلیدی کردار ادا کریں۔
انہوں نے ان خیالات کا اظہار ووٹ کے اندراج کے حوالے سے یوتھ سیمینار سے خطاب کر تے ہوئے کیا۔ سیمینار میں مختلف محکموں کے افسران، نمائندوں،سماجی تنظیموں کے راہنماؤں اور نوجوانوں ووٹرز کی ایک بڑی تعداد نے شرکت کی۔ ڈسٹرکٹ الیکشن کمشنر خالد رشید اور الیکشن آفیسر عارفہ اصغرکاکہنا تھا کہ ہمارے ملک میں نوجوانوں کی ایک بڑی تعداد ووٹ کی اہل ہو چکی ہے،لیکن بعض حلقوں میں نواجوں کی عدم دلچسپی کے باعث ٹرن آؤٹ توقعہ سے کم رہتا ہے۔ضرورت ا س امر کی ہے کہ ہمارے ملک کی یوتھ اپنے قیمتی ووٹ کی اہمیت کو سمجھتے ہوئے انتخابات میں ووٹ کا استعمال ضرور کریں تا کہ انکے قیمتی ووٹ اور رائے سے ایک ایسی حکومت معرض و جود میں آئے جو حقیقی معنوں میں اس یوتھ کی ترجمانی اور ملک و قوم کی خوشحالی،معیشت کے استحکا م کے لیے اپنا بھر پور کردار ادا کر سکیں۔
انکاکہنا تھا کہ الیکشن کمیشن آ ف پاکستان کی جانب سے سول سوسائٹی کے مختلف شعبہ ہائے زندگی سے تعلق رکھنے والے افراد کو ووٹ کے اندراج اور ووٹ کے درست استعمال کے حوالے سے شعور اور آگاہی کا سلسلہ جاری ہے۔انکاکہنا تھا کہ آنے والے وقتوں میں ملک کے جمہوری عمل کو استحکام دینے اور حکومتوں کے قیام میں پاکستانی یوتھ کی بہت زیادہ اہمیت ہو گی۔اس لیے مختلف سیمینار اور تقریبات کے ذریعے یو تھ اور خواتین کوانکے ووٹ کی اہمیت کے حوالے سے مختلف پہلوؤں کے ذریعے آگاہی فراہم کی جا رہی ہے جبکہ مختلف سماجی تنظیموں، سرکاری تعلیمی اداروں میں بھی ووٹ کی اہمیت کے حوالے سے خصوصی مہم چلائی جا رہی ہے۔
