اسلام آباد (راشد ملک): فوجی سیمنٹ کمپنی کا سالانہ سیلز ڈیلرز ایونٹ 2025 دو دسمبر کو مونٹیج مارکی کمپلیکس، گلبرگ گرینز اسلام آباد میں منعقد ہوا، جس میں ملک بھر سے ڈیلرز، پروجیکٹس نمائندگان، ایکسپورٹرز، ٹرانسپورٹرز اور سیمنٹ انڈسٹری سے وابستہ کاروباری شخصیات نے بھرپور شرکت کی۔
تقریب سے خطاب کرتے ہوئے ڈائریکٹر مارکیٹنگ اینڈ سیلز بریگیڈیئر ریٹائرڈ صلاح الدین ایوبی نے کہا کہ ملکی معیشت کی مضبوطی اور کاروباری شعبے کی ترقی میں ڈیلرز اور بزنس پارٹنرز کا کردار بنیادی اہمیت رکھتا ہے۔ انہوں نے بتایا کہ فوجی سیمنٹ نے اس سال 54 لاکھ ٹن سیمنٹ کی ریکارڈ فروخت کی، جس کا کریڈٹ ڈیلرز کی محنت اور پیشہ ورانہ صلاحیتوں کو جاتا ہے۔
انہوں نے مزید کہا کہ کمپنی ماحول دوستی اور قدرتی وسائل کے تحفظ پر خصوصی توجہ دے رہی ہے، جن میں زیرِ زمین پانی کے ذمہ دارانہ استعمال، پہاڑوں کی کٹائی میں کمی، بڑے پیمانے پر شجرکاری، متبادل انرجی کے ذرائع، اور جدید تحقیق پر مستقل عملدرآمد شامل ہے۔ انہوں نے کہا کہ ملک میں کاروباری ماحول بہتر ہو رہا ہے اور اس نوعیت کے ایونٹس اعتماد میں اضافے کے ساتھ کاروباری سرگرمیوں کو بھی فروغ دیتے ہیں۔
تقریب کے مہمانِ خصوصی، فوجی سیمنٹ کے ایم ڈی/سی ای او قمر حارث منظور نے خطاب کرتے ہوئے کہا کہ موجودہ معاشی چیلنجز کے باوجود کمپنی کی کارکردگی قابلِ تعریف ہے اور مستقبل میں مزید ترقی کے بہترین مواقع موجود ہیں۔ انہوں نے ڈیلرز پر زور دیا کہ وہ اپنی صلاحیتوں کو مزید بہتر بناتے ہوئے آئندہ سال بھی اسی جوش و جذبے سے کام کریں۔
تقریب کے آخر میں، سال 2024-25 کے دوران بہترین کارکردگی دکھانے والے ڈیلرز کو خصوصی ایوارڈز اور شیلڈز پیش کی گئیں۔ شرکاء کو آئندہ سال کی حکمتِ عملی، اہداف اور جدید کاروباری منصوبوں سے بھی آگاہ کیا گیا۔
فوجی سیمنٹ کی سینئر مینجمنٹ — بریگیڈیئر کاشف نوید، بریگیڈیئر خرم مرزا، عمر اشرف، سید کامران، قیصر محمود شیخ اور عرفان نسیم شیخ — نے بھی تقریب میں شرکت کی۔ تقریب کی میزبانی مینجر مارکیٹنگ/سیلز محمد اشرف ملک نے انجام دی۔
معروف گلوکار شان خان نے اپنی اردو اور پشتو گائیکی سے تقریب کو چار چاند لگا دیے، جبکہ آخر میں شرکاء کے لیے خصوصی ظہرانے کا بھی اہتمام کیا گیا۔
