اٹک (روشن پاکستان نیوز): دریائے سندھ کے کنارے سونے کی تلاش کرنے والے افراد کو سونا نہ مل سکا مگر موت مل گئی۔
نجی ٹی وی کے مطابق دریائے سندھ اٹک کے قریب چار افراد دریا کے کنارے پر سونا تلاش کر رہے تھے۔ مگر قسمت کو کچھ اور منظور تھا۔ انہیں سونا نہ مل سکا، مگر موت مل گئی۔
سونے کی تلاش کرنے والے افراد پر ریت کا ٹیلا گر پڑا، جس کے تلے دب کر دو افراد موقع پر ہی جاں بحق ہو گئے جب کہ دو زخمی ہو گئے۔
پولیس حادثہ کی اطلاع ملتے ہی جائے وقوعہ پر پہنچی اور ریسکیو ٹیموں کی مدد سے ریت کے ٹیلے تلے دبے افراد کو نکال کر لاشوں اور زخمیوں کو اسپتال منتقل کیا، جہاں ایک زخمی کی حالت تشویشناک بتائی جاتی ہے۔
مزید پڑھیں: سابق اسپیکر سندھ اسمبلی آغا سراج درانی انتقال کر گئے
پولیس کا کہنا ہے کہ متوفیان اور زخمی افراد دریا کے کنارے سونے کی تلاش کر رہے تھے۔
واضح رہے کہ خیبر پختونخوا حکومت نے صوبہ بھر میں کان کنی اور سونے کی تلاش پر پابندی عائد کر رکھی ہے۔
