اسلام آباد(روشن پاکستان نیوز) پاکستان میں سونے کی قیمتوں میں آج نمایاں اضافہ دیکھنے میں آیا ہے۔ فی تولہ سونا 5 ہزار 100 روپے مہنگا ہو کر 3 لاکھ 98 ہزار 800 روپے کی نئی بلند ترین سطح پر پہنچ گیا۔

آل پاکستان جیمز اینڈ جیولرز ایسوسی ایشن کے مطابق، 10 گرام سونے کی قیمت میں بھی 4 ہزار 372 روپے کا اضافہ ریکارڈ کیا گیا ہے، جس کے بعد نئی قیمت 3 لاکھ 41 ہزار 906 روپے ہو گئی ہے۔

ماہرین کے مطابق بین الاقوامی مارکیٹ میں سونے کی قیمتوں میں اضافے، روپے کی قدر میں کمی، اور مقامی طلب و رسد کے دباؤ کے باعث سونے کی قیمتوں میں مسلسل اضافہ ہو رہا ہے۔

مزید پڑھیں: بھارتی کپتان کو محسن نقوی اور سلمان آغا سے ہاتھ ملانا مہنگا پڑ گیا

سرمایہ کاروں کا وہ طبقہ، جو روایتی طور پر سونے کو محفوظ سرمایہ کاری سمجھتا ہے، سونے کی تیزی سے بڑھتی ہوئی قیمتوں پر تشویش کا شکار ہے۔

ماہرین نے خدشے کا اظہار کیا ہے کہ اگر یہی رجحان برقرار رہا تو آئندہ دنوں میں سونا مزید مہنگا ہو سکتا ہے۔

چاندی کی قیمت بلند ترین سطح پر 

سونے کے ساتھ ساتھ چاندی کی قیمتوں میں بھی مسلسل اضافہ جاری ہے، جس کے باعث مقامی اور عالمی مارکیٹس میں چاندی کی قیمت اپنی تاریخ کی بلند ترین سطح پر پہنچ گئی ہے۔

آج چاندی کی فی تولہ قیمت میں 42 روپے کا اضافہ ہوا ہے، جس کے بعد یہ ملکی تاریخ میں پہلی بار 4,637 روپے پر پہنچ گئی ہے۔