اسلام آباد (روشن پاکستان نیوز) – ایولان ہائوسنگ سوسائٹی کے مالکان پر عوام کے ساتھ دھوکہ دہی اور میڈیا کو اشتہارات کی ادائیگی نہ کرنے کے سنگین الزامات سامنے آئے ہیں۔ تفصیلات کے مطابق، ایولان ہائوسنگ سوسائٹی نے نہ صرف عوام کے ساتھ فراڈ کیا بلکہ میڈیا کو بھی آٹھ کروڑ روپے کے اشتہارات کی ادائیگی سے انکار کر دیا۔ یہ سوسائٹی عوام سے اربوں روپے وصول کرنے کے بعد اپنے وعدوں پر پورا نہیں اتری، جس کے نتیجے میں سینکڑوں متاثرین نے احتجاج کا فیصلہ کیا ہے۔

سوسائٹی کے متاثرین کا کہنا ہے کہ انہوں نے اپنی جمع پونجی ایولان ہائوسنگ سوسائٹی میں سرمایہ کاری کی تھی، لیکن سوسائٹی کے مالکان نے نہ تو انہیں ان کی جائیدادیں فراہم کیں اور نہ ہی ان کے ساتھ کیے گئے معاہدوں پر عملدرآمد کیا۔ متاثرین نے یہ بھی بتایا کہ سوسائٹی نے میڈیا میں کروڑوں روپے کے اشتہارات دیے، لیکن ان اشتہارات کی ادائیگی نہیں کی، جس کے بعد آل پاکستان نیوز پیپرز سوسائٹی (اے پی این ایس) نے ایولان ہائوسنگ سوسائٹی کو بلیک لسٹ کر دیا ہے اور ہر قسم کی کوریج سے منع کر دیا ہے۔

ایولان ہائوسنگ سوسائٹی کے مالکان میں عبداللہ سٹی کے مالک عاصم عزیز، پاکستان تحریک انصاف کے سابق رہنما اور سابق وفاقی وزیر عامر محمود کیانی، سابق گورنر سندھ عمران اسماعیل، اور سینیٹر طلحہ محمود کے بھانجے سمیت دیگر معروف شخصیات شامل ہیں۔ متاثرین کا کہنا ہے کہ یہ تمام افراد سوسائٹی کے شیئر ہولڈرز ہیں اور انہوں نے عوام کے ساتھ فراڈ میں برابر کا کردار ادا کیا ہے۔

متاثرین نے اپنے احتجاج کا اعلان کرتے ہوئے کہا کہ وہ اب سڑکوں پر آئیں گے اور سوسائٹی کے مالکان کے گھروں کے سامنے پرامن احتجاج کریں گے۔ ان کا کہنا تھا کہ انہوں نے اپنی زندگی بھر کی جمع پونجی اس سوسائٹی میں لگائی تھی، لیکن اب ان کے پیسے ہڑپ کر لیے گئے ہیں اور انہیں انصاف دلانے والا کوئی نہیں ہے۔ متاثرین نے یہ بھی کہا کہ ادارے بھی سوسائٹی کے مالکان کے ساتھ ملے ہوئے ہیں، جس کی وجہ سے انہیں انصاف نہیں مل رہا۔

واضح رہے کہ عبداللہ سٹی کو ایولان ہائوسنگ سوسائٹی میں ضم کر دیا گیا تھا، جس کے بعد یہ معاملہ مزید پیچیدہ ہو گیا ہے۔ متاثرین کا کہنا ہے کہ وہ اب مزید خاموش نہیں بیٹھیں گے اور اپنے حقوق کے لیے آواز اٹھائیں گے۔ انہوں نے حکومت اور متعلقہ اداروں سے فوری طور پر اس معاملے میں مداخلت کرنے اور انصاف فراہم کرنے کا مطالبہ کیا ہے۔

یہ معاملہ نہ صرف ایولان ہائوسنگ سوسائٹی کے مالکان کے لیے ایک بڑا چیلنج ہے، بلکہ اس نے میڈیا کی اخلاقیات اور اداروں کی ذمہ داریوں پر بھی سوالیہ نشان لگا دیا ہے۔ عوام کی جانب سے احتجاجی مہم کا آغاز ہو چکا ہے، اور دیکھنا یہ ہے کہ اس معاملے میں انصاف کب اور کیسے ملتا ہے۔

مزید پڑھیں: پاکستان فیڈرل یونین آف جرنلسٹس (پی ایف یو جے) کا پیکا قانون کے خلاف ملک بھر میں احتجاجی تحریک شروع کرنے کا اعلان