اسلام آباد(روشن پاکستان نیوز) ایران اور اسرائیل کے درمیان حالیہ جنگ کے بعد خطے میں سیاسی اور عوامی رویوں میں تبدیلی واضح طور پر محسوس کی جا رہی ہے۔ ایسی ہی ایک مثال ایک وائرل ویڈیو ہے جو سوشل میڈیا پر گردش کر رہی ہے، جس میں ایرانی عملہ پاکستانی زائرین کو رخصت کرتے وقت “پاکستان زندہ باد” کے نعرے لگا رہا ہے۔ یہ مناظر ایران کی ایک ایئرپورٹ پر فلمائے گئے ہیں، جہاں زائرین کے جذباتی لمحات کو کیمرے کی آنکھ نے محفوظ کر لیا۔
اس ویڈیو نے سوشل میڈیا پر پاکستانی صارفین کے دل جیت لیے ہیں، اور ہزاروں افراد نے اسے شیئر کیا ہے۔ صارفین کا کہنا ہے کہ یہ مناظر ایران اور پاکستان کے عوام کے درمیان محبت، بھائی چارے اور باہمی احترام کی عکاسی کرتے ہیں۔ ایک صارف نے لکھا، “ایران کا یہ اندازِ محبت دیکھ کر دل خوش ہو گیا، یہی اصل اسلامی اخوت ہے۔” ایک اور صارف نے تبصرہ کیا، “پاکستان زندہ باد کے نعرے ایرانی بھائیوں کی طرف سے سننا قابلِ فخر لمحہ ہے۔”
کئی صارفین نے ایرانی قوم کے رویے کو سراہتے ہوئے کہا کہ مشکل حالات میں جو قربت اور یکجہتی اب دیکھنے کو مل رہی ہے، وہ مسلم دنیا کے اتحاد کی طرف ایک مثبت قدم ہے۔ سوشل میڈیا پر جاری تبصروں میں عوامی سطح پر پاکستانیوں کے لیے ایرانی احترام اور محبت کا خوب اظہار کیا جا رہا ہے، اور دونوں ممالک کے درمیان عوامی سطح پر تعلقات میں گرمجوشی کی ایک نئی لہر محسوس کی جا رہی ہے۔
یہ ویڈیو نہ صرف ایک لمحاتی واقعہ ہے بلکہ یہ اس بات کا ثبوت ہے کہ موجودہ جغرافیائی حالات نے امتِ مسلمہ کو قریب لانے کا موقع فراہم کیا ہے۔ ایسے لمحات دونوں اقوام کے درمیان مزید محبت، ہم آہنگی اور باہمی تعاون کو فروغ دینے میں اہم کردار ادا کر سکتے ہیں۔
مزید پڑھیں: برطانوی ٹی وی کے پروپیگنڈا پر ایرانی پروفیسر کا کرارا جواب
