راولپنڈی(کرائم رپورٹر) راولپنڈی پولیس کی جانب سے فورس کی فلاح و بہبود، شہریوں کے مسائل کے حل اور جرائم کے خاتمے کے لیے مختلف اقدامات کیے گئے۔ پولیس ہیڈکوارٹرز ڈی ایس پی مسعود شہید ہسپتال میں گرین سٹار سوشل مارکیٹنگ پاکستان کے تعاون سے فری میڈیکل کیمپ کا انعقاد کیا گیا، جبکہ ایس ایس پی آپریشنز نے پولیس لائنز میں کھلی کچہری لگائی۔ دوسری جانب مختلف کارروائیوں میں ڈکیتی اور موٹرسائیکل چوری میں ملوث ملزمان کو گرفتار کر لیا گیا، جبکہ ایک منشیات فروش کو عدالت نے 9 سال قید کی سزا سنا دی۔
ترجمان راولپنڈی پولیس کے مطابق پولیس ہیڈکوارٹرز ڈی ایس پی مسعود شہید ہسپتال میں لگائے گئے فری میڈیکل کیمپ میں ماہر ڈاکٹروں کی نگرانی میں پولیس افسران اور اہلکاروں کے ٹی بی ٹیسٹ، چیسٹ ایکسرے اور دیگر طبی معائنے کیے گئے، جبکہ انہیں مفت ادویات بھی فراہم کی گئیں۔ ایس پی سیکیورٹی اصغر گورائیہ نے کیمپ کا دورہ کرکے فراہم کی جانے والی طبی سہولیات کا جائزہ لیا۔ پولیس حکام کا کہنا ہے کہ آئی جی پنجاب کے ویژن اور سی پی او راولپنڈی ڈی آئی جی حسن مشتاق سکھیرا کی ہدایات کے مطابق فورس کی ویلفیئر کے لیے اقدامات جاری ہیں۔
ادھر ایس ایس پی آپریشنز ملک طارق محبوب نے پولیس لائنز ہیڈکوارٹرز میں کھلی کچہری کا انعقاد کیا، جہاں شہریوں کی شکایات سن کر متعلقہ افسران کو فوری کارروائی کی ہدایات جاری کیں۔ انہوں نے کہا کہ درخواستوں پر مقررہ مدت کے اندر قانونی کارروائی یقینی بنائی جائے اور شہریوں کے مسائل کے حل میں کسی قسم کی غفلت برداشت نہیں کی جائے گی۔
دوسری جانب راولپنڈی پولیس نے ڈکیتی، موٹرسائیکل چوری اور دیگر وارداتوں میں ملوث دو گینگز کے تین ملزمان کو گرفتار کر لیا۔ پولیس نے ملزمان کے قبضے سے چھ مسروقہ و چھینے گئے موٹرسائیکل، موبائل فون، 12 ہزار روپے نقدی، اسلحہ اور دیگر سامان برآمد کر لیا۔ پولیس کے مطابق گرفتار ملزمان کو ٹھوس شواہد کے ساتھ عدالت میں پیش کیا جائے گا۔
علاوہ ازیں، منشیات کے مقدمے میں معزز عدالت نے ملزم ایاز کو 9 سال قید اور 80 ہزار روپے جرمانے کی سزا سنائی۔ ملزم کو اپریل 2026 میں تھانہ نصیر آباد پولیس نے ایک کلو 480 گرام چرس برآمد ہونے پر گرفتار کیا تھا۔ پولیس کا کہنا ہے کہ منشیات کے خاتمے کے لیے کارروائیاں بلا تعطل جاری رہیں گی۔
