گوادر(روشن پاکستان نیوز) سیکورٹی ذرائع کے مطابق، فتنہ الہندوستان کے خلاف صبح سے جاری آپریشن میں جہنم واصل کیے جانے والے دہشتگردوں کی تعداد 67 تک پہنچ گئی ہے۔ پچھلے دو دن میں پنجگور اور شعبان میں 41 دہشتگرد مارے گئے تھے، جس کے بعد بلوچستان میں مجموعی طور پر 108 دہشتگرد ہلاک ہو چکے ہیں۔
سیکیورٹی ذرائع کے مطابق، اس بربریت کے خلاف لڑتے ہوئے دس بہادر پولیس اور سیکورٹی فورسز کے جوان شہادت کا رتبہ پا چکے ہیں۔ مزید تعاقبی آپریشنز جاری ہیں اور دہشتگردوں کے مزید ہلاکتوں اور نقصانات کی اطلاعات موصول ہو رہی ہیں۔
گوادر میں بلوچ مزدور خاندانوں پر دہشتگردوں کی بربریت
سیکیورٹی ذرائع کے مطابق، سفاک ہندوستانی پراکسی دہشتگردوں نے گوادر میں 11 معصوم بلوچ شہریوں کو شہید کر دیا۔ شہید ہونے والوں میں 5 مرد، 3 خواتین اور 3 بچے شامل ہیں، جو بلوچستان سے محنت مزدوری کے لیے گوادر آئے تھے۔
بلوچستان کے 12 مختلف علاقوں میں فتنہ الہندوستان کے حملے ناکام، 58 دہشت گرد ہلاک
سیکیورٹی ذرائع کا کہنا ہے کہ اس گھناؤنے واقعے میں ملوث تمام دہشتگردوں کو جہنم واصل کر دیا گیا ہے۔ اس واقعے کے خلاف گوادر کے عوام میں شدید غم اور غصہ پایا جاتا ہے۔
گرد و نواح کے علاقوں میں دہشتگرد عناصر کے ممکنہ ٹھکانوں کے خلاف مزید آپریشنز جاری ہیں۔ سیکورٹی ذرائع کا کہنا ہے کہ یہ حملہ واضح کرتا ہے کہ فتنہ الہندوستان بھارتی ہدایات پر بلوچستان کی ترقی اور خوشحالی کے خلاف سرگرم ہے۔
