اسلام آباد (عرفان حیدر) انسدادِ منشیات فورس (اے این ایف) نے تعلیمی اداروں کے اطراف اور ملک کے مختلف شہروں میں منشیات اسمگلنگ کے خلاف بھرپور کریک ڈاؤن کرتے ہوئے 10 مختلف کارروائیوں کے دوران 13 ملزمان کو گرفتار کر لیا۔
ترجمان اے این ایف کے مطابق کارروائیوں میں مجموعی طور پر 107.7 کلوگرام منشیات برآمد کی گئی، جن کی مالیت ایک کروڑ دو لاکھ روپے سے زائد بتائی جا رہی ہے۔ گرفتار ملزمان کے خلاف انسدادِ منشیات ایکٹ 1997 کے تحت مقدمات درج کر کے تحقیقات کا آغاز کر دیا گیا ہے۔
تعلیمی اداروں کے اطراف کارروائیاں
اے این ایف نے تعلیمی اداروں کے قریب منشیات فروشی کے خلاف خصوصی کارروائیاں کیں۔ سیکٹر آئی-12 اسلام آباد میں ایک یونیورسٹی کے قریب گاڑی سے 2.4 کلوگرام چرس برآمد کر کے 3 ملزمان کو گرفتار کیا گیا۔ ٹنڈو جام میں یونیورسٹی کے قریب ایک ملزم کے قبضے سے 2 کلوگرام چرس برآمد ہوئی۔
اسی طرح شیر شاہ ٹول پلازہ ملتان کے قریب 1.5 کلوگرام، شجاع آباد روڈ ملتان میں یونیورسٹی کے قریب 530 گرام چرس برآمد کی گئی۔ گرفتار ملزمان نے تعلیمی اداروں کے طلباء کو منشیات فروخت کرنے کا اعتراف بھی کیا ہے۔
مزید پڑھیں: اے این ایف کا ملک بھر میں منشیات اسمگلنگ کے خلاف بڑا کریک ڈاؤن، 175 کلوگرام منشیات برآمد، ایک ملزم گرفتار
دیگر شہروں میں بڑی کارروائیاں
وزیرآباد روڈ سیالکوٹ پر ایک کوریئر آفس میں قطر بھیجے جانے والے پارسل سے کتابوں کے صفحات میں جذب کی گئی 345 گرام آئس برآمد کی گئی۔ فیروز والا جی ٹی روڈ گجرات میں ٹرک اور گاڑی سے 70.8 کلوگرام چرس اور 13.2 کلوگرام افیون برآمد کر کے ایک ملزم کو گرفتار کیا گیا۔
مندرا ٹول پلازہ راولپنڈی کے قریب 9.6 کلوگرام چرس، جبکہ چناب ٹول پلازہ گجرات کے قریب گاڑی سے 4.8 کلوگرام چرس اور 1.2 کلوگرام افیون برآمد کر کے 3 ملزمان کو گرفتار کیا گیا۔ کندیاں پھاٹک قصور کے قریب ایک ملزم کے قبضے سے 1 کلوگرام ہیروئن اور ایک ڈرون برآمد ہوا۔
مزید برآں، انڈسٹریل اسٹیٹ روڈ حیات آباد پشاور کے قریب موٹر سائیکل سوار سے 400 گرام چرس برآمد کی گئی۔
ترجمان اے این ایف کا کہنا ہے کہ منشیات فروشوں کے خلاف کارروائیاں بلا امتیاز جاری رہیں گی، خصوصاً تعلیمی اداروں کو منشیات سے پاک رکھنے کے لیے زیرو ٹالرینس پالیسی اپنائی جا رہی ہے۔
