واشنگٹن/نیویارک(روشن پاکستان نیوز) امریکہ کی متعدد ریاستیں شدید برفانی طوفان کی لپیٹ میں ہیں جس سے نظام زندگی مفلوج ہو گیا اور سات افراد ہلاک ہو گئے ہیں۔

امریکی میڈیا کے مطابق واشنگٹن، نیویارک، ٹیکساس، اوکلاہوما اور نیوجرسی سمیت درجنوں ریاستوں میں شدید برفباری، بارش اور سرد ہواؤں کا سلسلہ جاری ہے۔ نیویارک کے دیہی علاقوں میں درجہ حرارت منفی 49 تک پہنچ گیا ہے، جبکہ شدید برفباری کے باعث 16 ہزار سے زائد پروازیں منسوخ ہو گئی ہیں اور 8 لاکھ سے زائد افراد بجلی سے محروم ہیں۔

بین الاقوامی میڈیا رپورٹس کے مطابق 24 ریاستوں میں ایمرجنسی نافذ کر دی گئی ہے اور 40 ریاستوں کے تقریباً 24 کروڑ افراد اس شدید موسم سے متاثر ہونے کا خدشہ ہے۔

نیویارک کی گورنر کیتھی ہوچل نے کہا کہ یہ کئی برسوں کا سب سے شدید موسم سرما ہے۔ نیویارک کے مختلف حصوں میں 8 سے 18 انچ برف باری متوقع ہے اور عوام کو غیر ضروری طور پر گھروں سے باہر نہ نکلنے کی ہدایت کی گئی ہے۔

مزید پڑھیں: ملک کے مختلف علاقوں میں آج سے بارش اور برفباری کے نئے سلسلے کی پیشگوئی

واشنگٹن اور گردونواح میں بھی 6 سے 10 انچ تک برف باری کی توقع ہے جس کی وجہ سے وفاقی دفاتر بند کر دیے گئے ہیں اور اسکولوں میں آن لائن کلاسز کا اعلان کیا گیا ہے۔

محکمہ موسمیات نے پیش گوئی کی ہے کہ یہ شدید برفانی طوفان اگلے ہفتے تک جاری رہ سکتا ہے۔