اسلام آباد (روشن پاکستان نیوز): وفاقی حکومت نے پاسپورٹ میں جعلسازی کی روک تھام کیلیے اہم قدم اٹھانے کا اعلان کر دیا ہے۔
ریڈیو پاکستان کی رپورٹ کے مطابق وفاقی وزیر داخلہ محسن نقوی نے اعلان کیا ہے کہ پاسپورٹ میں جعلسازی کی روک تھام کیلیے نئے سکیورٹی فیچرز متعارف کروائے جائیں گے۔
وزیر داخلہ محسن نقوی نے یہ بات بیجنگ پبلک سکیورٹی پاسپورٹ بیورو کے دورے کے دوران اظہار خیال کرتے ہوئے بتائی، ڈائریکٹر جنرل ِSUN YU نے آمد پر ان کا استقبال کیا۔
محسن نقوی نے بیورو کے مختلف حصوں کا دورہ کیا اور چین کے پاسپورٹ اور امیگریشن پالیسی اور درخواست سے طباعت تک پاسپورٹ کے اجراء کے تمام مراحل کے بارے میں تفصیلی بریفنگ دی۔
وزیر داخلہ نے چین کے امیگریشن نظام کی افادیت اور مؤثر طریقہ کار کو سراہا اور کہا کہ پاکستان نے بھی پاسپورٹ اور امیگریشن کا ایک تیز رفتار اور جامع نظام تیار کیا ہے۔
ان کا مزید کہنا تھا کہ بیجنگ ماڈل کی طرز پر پاکستان بھی امیگریشن کا جدید نظام وضع کر رہا ہے۔
سال 2025 میں کتنے پاکستانیوں نے پاسپورٹ بنوائے؟
سال 2025 کے اختتام پر ڈائریکٹوریٹ آف پاسپورٹس اینڈ امیگریشن کی سالانہ کارکردگی رپورٹ جاری کی گئی۔ وزیر اعظم شہباز شریف اور وزیر داخلہ محسن نقوی کی ہدایات پر ڈی جی پاسپورٹس کی قیادت میں سال 2025 کو انقلابی اقدامات کا سال قرار دیا گیا۔
مزید پڑھیں: آنکھوں کے معمولی مرض سے پیدا ہونیوالی خطرناک بیماری
رپورٹ کے مطابق جدید پرنٹرز کی تنصیب کے باعث پاسپورٹس کے طویل عرصے سے موجود بیک لاگ کا مستقل طور پر خاتمہ ممکن بنایا گیا۔
محکمہ پاسپورٹ کے مطابق 2025 میں مجموعی طور 55 لاکھ 72 ہزار 13 پاسپورٹ جاری کیے گئے، ایک سال میں اتنی بڑی تعداد میں پاسپورٹ اجرا تاریخ میں سب سے زیادہ ہے۔
اعداد و شمار کے مطابق نارمل کیٹیگری کے 32 لاکھ 75 ہزار 263 جبکہ ارجنٹ کیٹیگری کے 18 لاکھ 39 ہزار 487 پاسپورٹ جاری ہوئے، فاسٹ ٹریک کیٹیگری میں 2 لاکھ 76 ہزار 789 پاسپورٹ کا اجرا کیا گیا۔
محکمہ پاسپورٹ کے مطابق 24 گھنٹے پاسپورٹ دفاتر کھلے رکھنے کی سہولت سے پاسپورٹ اجرا میں آسانی ہوئی ہے۔
رپورٹ میں یہ بھی بتایا گیا کہ سال 2025 کے دوران شہریوں میں جدید ای پاسپورٹس بنوانے کے رجحان میں نمایاں اضافہ دیکھنے میں آیا۔
