دبئی(روشن پاکستان نیوز) دبئی پولیس نے عوام کو جعلی ورک ویزا اسکیموں اور ویزا فراڈ سے ہوشیار رہنے کی ہدایت جاری کی ہے۔
پولیس کے مطابق فراڈیے مختلف طریقوں سے لوگوں کو روزگار کا جھانسہ دے کر رقم ہتھیانے کی کوشش کر رہے ہیں۔
دبئی پولیس کے کریمنل انویسٹی گیشن ڈیپارٹمنٹ کے اینٹی فراڈ سینٹر نے اپنے بیان میں کہا ہے کہ جعلی ویزا آفرز کے ذریعے شہریوں اور غیر ملکیوں کو نشانہ بنایا جا رہا ہے، اس لیے ایسی پیشکشوں سے نمٹنے کے لیے انتہائی احتیاط ضروری ہے۔
پولیس نے خبردار کیا ہے کہ جعلی ویزا اسپانسرشپ اور گارنٹی ویزا کے جھوٹے دعوے کرنے والوں سے محتاط رہیں، کیونکہ اس وقت بڑی تعداد میں فراڈیے بے روزگار افراد کو نوکری کا لالچ دے کر دھوکہ دے رہے ہیں، جن کی پیشکشوں کا حقیقت سے کوئی تعلق نہیں ہوتا۔
دبئی پولیس نے واضح کیا ہے کہ دبئی میں ملازمت صرف سرکاری ذرائع اور قانونی طور پر لائسنس یافتہ ریکروٹمنٹ ایجنسیوں کے ذریعے ہی حاصل کی جا سکتی ہے، جبکہ غیر قانونی چینلز کے ذریعے ویزا یا نوکری کی پیشکشیں اکثر فراڈ ثابت ہوتی ہیں۔
مزید پڑھیں: نیو ایئر نائٹ پر پنجاب پولیس ہائی الرٹ، صوبہ بھر میں سخت سیکیورٹی انتظامات
حکام نے عوام کو ہدایت کی ہے کہ اگر کوئی شخص جعلی ویزا اسکیم کا شکار ہو جائے تو فوری طور پر پولیس سے رابطہ کرے اور واقعے کی اطلاع دے۔
اس کے علاوہ اگر کسی کو آن لائن کوئی مشکوک ویزا آفر نظر آئے تو اسے بھی رپورٹ کیا جائے تاکہ دیگر افراد کو دھوکہ دہی سے بچایا جا سکے۔
دبئی پولیس نے مزید کہا ہے کہ کسی بھی ویزا کی پیشکش پر ادائیگی کرنے سے قبل متعلقہ سرکاری اداروں سے اس کی تصدیق کرنا انتہائی ضروری ہے تاکہ کسی بھی ممکنہ فراڈ سے محفوظ رہا جا سکے۔
