راولپنڈی(روشن پاکستان نیوز) سول سروسز اکیڈمی لاہور کے 53ویں کامن ٹریننگ پروگرام (CTP) کے تحت زیرِ تربیت افسران پر مشتمل 15 رکنی وفد نے اینٹی نارکوٹکس فورس (ANF) کے ہیڈکوارٹرز کا تعلیمی دورہ کیا۔
دورے کے دوران بریگیڈیئر سید عمران علی، ڈائریکٹر انفورسمنٹ اے این ایف نے وفد کو ادارے کے تنظیمی ڈھانچے، منشیات کے خاتمے کے لیے اے این ایف کے کلیدی کردار، اور انسدادِ منشیات کے ضمن میں حاصل کی گئی کاوشوں اور کامیابیوں پر تفصیلی بریفنگ دی۔ سیشن میں اے این ایف کی نمایاں عملی کارروائیوں، عوامی آگاہی مہمات اور بین الاقوامی اسٹیک ہولڈرز کے ساتھ تعاون پر بھی روشنی ڈالی گئی۔
اس موقع پر اے این ایف کی “انسدادِ منشیات مہم برائے تعلیمی ادارہ جات” پر بھی تبادلہ خیال کیا گیا، جس کا مقصد طلبہ اور تعلیمی حلقوں میں منشیات کے مضر اثرات سے متعلق آگاہی پیدا کرنا ہے۔ ان مہمات کے نتائج کو نہایت مثبت قرار دیا گیا، جو نوجوانوں میں منشیات کے خلاف بڑھتے ہوئے شعور اور شمولیت کا مظہر ہیں۔
مزید پڑھیں: لاہور، نیو ائیر نائٹ کیلئے سخت سیکیورٹی پلان تیار، خلاف ورزی پر سزا کا اعلان
تقریب کا اختتام ایک تعمیری مکالمے پر ہوا، جس میں ڈائریکٹر جنرل اے این ایف، میجر جنرل عبد المُعید ہلالِ امتیاز (ملٹری) نے شرکاء کے سوالات کے جوابات دیے اور منشیات سے پاک معاشرے کے قیام کے لیے مشترکہ اور مربوط کوششوں کی ضرورت پر زور دیا۔ انہوں نے امید ظاہر کی کہ یہ دورہ زیرِ تربیت افسران کی پیشہ ورانہ صلاحیتوں کو مزید نکھارنے میں اہم کردار ادا کرے گا۔
وفد کے شرکاء نے اے این ایف کی پیشہ ورانہ مہارت، عزم اور قومی سلامتی کے ساتھ ساتھ نوجوانوں کے تحفظ کے لیے جاری خدمات کو سراہا۔
